Read zemba 2 Ovatessalonika 1 Bible Online

2 Ovatessalonika 1 - zemba bible

2 Ovatessalonika 1

¹Omukanda hembu mau dhi kwaame Paulus naSilvanus naTimoteus. Me sonekele eongalo lyomoTessalonika, ovantu vaKalunga Tate naMuhona Jesus Kristus.

²Et̯ilonkenda nouwa waKalunga Tate nowaMuhona Jesus Kristus ngau kale nan̯e.

³Vakwetu, nt̯e apehe twa thele okuyandja ompandu kuKalunga mena lyen̯i, otjo tji li nawa, mena lyokutya eitavelo lyen̯i mali kulu unene, nohole himu lihole amuhe ya ningi onene.

⁴Iya nt̯e momaongalo aKalunga tu litangela n̯e, mena lyelikambulithilo lyen̯i neitavelo lyen̯i, apehe amamu tatethwa namamu monethwa ovihuna mu likambulithila.

⁵Hehi matji yulike okutya ekoyo lyaKalunga lya vyuuka, iya n̯e mamu thevelwa otjilongo tjaKalunga ngahi mamu tji tatethelwa wo.

⁶Iya Kalunga tje mu vyuukila, ma yumaneke ovatatethi ven̯i mbave mu tatetha.

⁷N̯e mbamwa tatethwa, Kalunga me mu pa oluthuwo pamo nant̯e, Muhona wetu Jesus hima ka hololoka momulilo mbwaa tema okudha meulu pamo novaengeli ve ovanadhonkono

⁸okuyumaneka mboka mbahave i Kalunga namboka mbahava tee ondaka ombwa yaMuhona wetu Jesus.

⁹Ovantu mboka mava ka vadhwa koluyuma lwehan̯auno lyaapehe, ndyoka ndimali ke ve yapula kuMuhona noketumbalo lyodhonkono dhe.

¹⁰Metango ndyoka Muhona Jesus hime ya, mbave mu itavela, mave mu tumbaleke, have kumwa. N̯e mamu ka kala mokati kawo, mena lyokutya mwa itavela elaka nditwe mu heela.

¹¹Iya otjo tu mu kumbila apehe, Kalunga ketu, e mu tale okutya mwe thevelwa okwiithanwa, ye a hwithile po ehalo lyen̯i alihe nodhonkono, mu kale nehalo ewa motjilinga tjeitavelo.

¹²Ena lyaMuhona wetu Jesus opo li tumbalekwe mun̯e, nan̯e mu tumbalekwe muye ket̯ilonkenda lyaKalunga ketu naMuhona Jesus Kristus.