Read zemba 2 Ovatessalonika 3 Bible Online

2 Ovatessalonika 3 - zemba bible

2 Ovatessalonika 3

¹Vakwetu, iya tu kumbilen̯i, ondaka yaMuhona opo i tjiiwe okuhandjana, i ka tumbalekwe ngahi i tumbalekwa kun̯e.

²Tu kumbilen̯i, tu hupithwe movantu ovavi nomodhomputji, mena lyokutya havantu avehe va itavela ondaka yaMuhona.

³Muhona omuliun̯ikwa me mu pameke, ye me mu amene kouvi.

⁴Tu na eliun̯iko muMuhona ngahi twe liun̯ika mun̯e, okutya napano nokomeho mamu ningi ovipuka mbyoka mbitwe mu heela.

⁵Iya napano Muhona nga viyule omitima vyen̯i mu kale amu hole Kalunga, n̯e mu kale noutakamethi waKristus.

⁶Vakwetu, matu mu heele mena lyaMuhona Jesus Kristus. Kalen̯i kokule novantu mboka mbahava hala okuundapa, wo mbahava tee hitu mu longa.

⁷N̯e ovene mu tji i nawa okutya mwa thele oku tu holela, mena lyokutya nt̯e katwa li nondende nahi hitu kala nan̯e.

⁸Nt̯e nahi katu li ovikulya otjali pomuntu nokanunu, iya tu undapa nodhonkono omutenya nout̯iku, katu yandjele oudheu komuntu noumo mun̯e.

⁹Hehi katu tji ningile vala mena lyokutya tu na odhonkono, iya twe tji ninga mena lyokutya mu ithe ko otjiholelwa, opo mu tu holele.

¹⁰Hitwa li pamo nan̯e, twe mu heelele okutyaa: “Nguhama hala okuundapa, há li.”

¹¹Twa tyaa okutya mokati ken̯i mu na ovantu vamo, mbave na ondende, mbahave na hiva undapa, mbava tjivauluka vala.

¹²Iya napano ovantu mbave li nyahoka, matu ve londola amatu ve pukulula muMuhona Jesus Kristus okutya ngava tutuvale, ve liundapele ovikulya vyawo ovene.

¹³Iya vakwetu, hámu poyola, undapen̯i ouwa.

¹⁴Andaa pe na omuntu nguhama tee odhondaka dhetu ndhii li momikanda hembi, omuntu ngoka hámu liende, opo a t̯ithwe ohon̯i.

¹⁵Hámu mu ningi ngondjedhi, iya mu pukululen̯i ngomwiitaveli mukwen̯i.

¹⁶Iya napano Muhona nguu yandja ouwa, nge mu pe ouwa apehe. Muhona nga kale pamo nan̯e amuhe.

¹⁷Aame Paulus, me mu menekele po, mba soneke nokuwoko kwandje omwene. Otjo ndji soneka hinyahi omikanda vyandje.

¹⁸Et̯ilonkenda lyaMuhona wetu Jesus Kristus ngali kale nan̯e amuhe.