Read zemba 1 Timoteus 3 Bible Online

1 Timoteus 3 - zemba bible

1 Timoteus 3

¹Ondaka hendji oyatjatjili ndjimai tya omuntu nguma hala a kale omuviyuli weongalo, ma hala otjilinga otjiwa.

²Omuviyuli weongalo ka tha okukala nombedhi, u tha okukala nomukadhintu umo, nguu liyunga nawa, onkengela, nguu na onkalo ombwa, nguu yakula ovayenda, nguma ulu okulonga ovantu,

³hankolwe, hampuhi, iya omuntu nguu na olweembya, nguha tanguna, nguhe na olwiho nodhombongo.

⁴Omuviyuli weongalo u tha okukala omuntu nguu tji i okutekula onganda ye. Odhondele dhe va tha okutila ovantu.

⁵Omuntu andaa kaa ulu okutekula onganda ye, ma ulu vi okutakametha eongalo lyaKalunga?

⁶Omuviyuli ka tha okukala omuntu ngoka ngwaa dhi pokuliteyulula, mpe me linomo, ha yumanekwa ngahi tja yumanekwa omudiapoli.

⁷Nga kale omuntu nguu tumbalekwa nokovantu mbahave thi ovakwaneongalo, opo há penywa, ye ahama i momoo womudiapoli.

⁸Ovapopili veongalo va tha okukala ovantu mbava pukuluka, mbahave na ovithithi. Kava tha okukala odhonkolwe ne mbave na olwiho nodhombongo.

⁹Wo va tha okukambulitha otjiholekwa tjeitavelo melityoo ewa.

¹⁰Ovantu hemba olutenga va tha wo okutalwa, andaa kava monekele ombedhi, opo mave tjiiwa okwiila ovapopili veongalo.

¹¹Ovakadhintu wovapopili va tha okukala ovantu mbava pukuluka. Kava tha okukala ovantu womalwaambo. Kava tha okukala odhonkolwe. Va tha okukala ovaliun̯ikwa movipuka avihe.

¹²Omupopili weongalo u tha okukala nomukadhintu umo, ye nga kale ae tji i okutekula ovana nonganda ye.

¹³Mbamava undapa nawa ovilinga vyawo, mava ka mona etumbalo meongalo. Mava kala nouvandhi meitavelo okwiitavela Kristus Jesus.

¹⁴Ame nandaku tiwa ndji na eliun̯iko okuya dhiva kwoove, me ku sonekele omukanda hembu,

¹⁵opo andaa hí dhile dhiva, omukanda hembu u ku heele hitu tha okukala monganda yaKalunga. Onganda hendji oyo i li eongalo lyaKalunga nguu na omwenyo, ndii li ongundhi nekulameno lyatjatjili.

¹⁶Kape na tja omuntu nguma tetha ombata okutya otjiholekwa tjeitavelo lyetu otjinene: Kalunga we ya molutu, Ombepo ye mu yulika okutya omuvyuuki, wa moneka kovaengeli. Wa teethelwa mokati koviwan̯a, wa itavelwa mouye, ha twalwa meulu.