Read zemba 1 Timoteus 4 Bible Online

1 Timoteus 4 - zemba bible

1 Timoteus 4

¹Iya Ombepo Ondhilikwa mai thitulula nawa himai tya pomatango athiinina ovantu vamo mava ka yetha eitavelo, hava landula odhombepo dhokupukitha nomalongo odhondemoni.

²Omalongo ngae li hinyahi a dha movalinomi mbava popya ovithithi, mbave na omalityoo ngaa t̯a, ngaa ngala a hikwa notjivela hitja pupyala.

³Va tjaela ovantu okutya ahamava kupu ne ahamava kupwa, wo ahamava li ovikulya mbyaa utwa kuKalunga vi liwe nompandu kovaitaveli nokovantu mbave i otjatjili.

⁴Mena lyokutya otjipuka atjihe Kalunga hiaa uta otjiwa, katja thele okuyekelwahi, iya tja thele okutambulwa nompandu.

⁵Iya odhondaka dhaKalunga nealikano odho madhi tji tambulitha kuKalunga.

⁶Andaa mo longo ovakwen̯i ovipuka hembi, okutya mo ile omuntu omuwa waKristus Jesus. Iya mo palulwa nodhondaka dheitavelo nelongo ewa ngahi wa kala mulyo.

⁷Hó litwaa modhongano nomovipuka mbihavi na otjilinga, lidheula okukala nontilokalunga.

⁸Okulidheula kolutu maku popile kanunu, iya okukala nontilokalunga matji popile movipuka avihe, mena lyokutya tji na eudhiko lyomwenyo wanapano nowokomeho.

⁹Ondaka hendji oyatjatjili, ya thele okutambulwa.

¹⁰Nt̯e matu undapa unene amatu kondjo, mena lyokutya nt̯e twe liun̯ika muye nguu li Kalunga omunamwenyo. Kalunga oye e li Omuhupithi wovantu avehe, unene tuu mboka mbava itavela muye.

¹¹Ovipuka hembi ve heela vyo, ove u ve longe.

¹²Hápa kala omuntu nguma tombo oudhantu woye. Iya kala otjiholelwa tjovaitaveli mokupopya, mokweenda, mohole, meitavelo nomouhila.

¹³Kambulitha u kale amo ve tangele omisonekwa, u ve pukulule, u ve longe katee me ya.

¹⁴Hó ningi eteya otjali hiwa pewa mouprofeti, ovanene veongalo hive ku tendeka omawoko.

¹⁵Ovipuka hembi vi twaa movilinga, ove u litwee mo movipuka hembi mbimbe ku heela, omuntu auhe opo a mona onkalamwenyo yoye yopaukriste himai i komeho.

¹⁶Liyunga, ove u yunge elongo lyoye. Kala mulyo. Iya andaa mo ningi nyahoka, mo lihupitha, nambamave ku teelele, mo ve hupitha.