Read zemba 1 Timoteus 5 Bible Online

1 Timoteus 5 - zemba bible

1 Timoteus 5

¹Hó kalaene ombwale, mu pukulula ngahi u pukulula iho. Omatele e pukulula ngahi u pukulula ovakuloye ne ovanitjoye.

²Ovakulukadhi ve pukulula ngahi u pukulula oonyoko. Ovathukona ve pukulula nawa nouhila.

³Tumbaleka ovahepe mbave li ovahepe vatjatjili.

⁴Omuhepe nguu na ovana ne odhontekulona, ngave lilonge okut̯ila otjiho odhonganda dhawo, va popile owoina nowoinamukulukadhi, va t̯ile ovanene vawo otjiho ngawo hiva t̯ilwa otjiho, mena lyokutya hehi otjo tji li otjiwa kotjipala tjaKalunga.

⁵Omuhepe watjatjili onguhe na ngume mu t̯ile otjiho, u liun̯ika muKalunga, u kala ama kumbu kuKalunga omutenya nout̯iku.

⁶Omuhepe ngume litwaa movipuka vyokulihulukithwa, wa t̯a nandaku tiwa, ye u na omwenyo.

⁷Ve heela ovipuka hembi, opo hápa kala ngume ve pa ombedhi.

⁸Iya nguhama t̯ile owoyawo otjiho, unene tuu owonganda yawo, ma holeke eitavelo, omuntu ngoka omuvi, wa pon̯wa nokunguhe thi omwiitaveli.

⁹Nguma hawa okutya omuhepe, onguu na odhombula omilongo epandu, ye ngwaa li nomulumentu umo,

¹⁰nguu hipululwa okutya wa undapa ovilinga oviwa, ngwaa tekula ovana, ye ha yakula ovayenda, ha koho odhompadhi dhovantu ovadhilikwa, ngwaa popila ovathona, ye ha kambulitha okuundapa otjilinga atjihe otjiwa.

¹¹Ovahepe mbahaveya kulupa, ve yetha, mena lyokutya ehalo lyawo okukupwa, kuKristus va dha ko.

¹²Mave lietele onkali, mena lyokutya va yetha soka hiva anenene olutenga.

¹³Mave ilile wo okukala nondende nokweendaenda nodhonganda, iya handende vala aika nomalwaambo nokulitwaa movipuka vyovantu nokupopya ovipuka mbihavya thele okupopiwa.

¹⁴Iya ame me hala okutya ovahepe mbahaveya kulupa ngava kupwe, va yumuke odhondele dhawo, va yunge odhonganda dhawo, opo háva yandja oluvedhe kumbave na onki nant̯e, ve tu popye navi.

¹⁵Ovahepe vamo mondjila va dha mo, va landula Satana.

¹⁶Andaa pe na omwiitaveli nguu na ovahepe, nge ve t̯ile otjiho, eongalo opo háli twikwa omutenge, li tjiiwe okupopila ovahepe vamo mbahave na ovantu.

¹⁷Ovanene veongalo mbava undapa nawa ovilinga vyawo, ngava tumbalekwe unene, unene tuu mbave li motjilinga tjokuteetha nokulonga.

¹⁸Iya Omusonekwa mau tyaa: “Hó kutu onani kotjinyo, amai yungula,” omukwawo mau tyaa: “Omuundapi we liundapela ondjambi ye.”

¹⁹Omunene weongalo amaku tiwa u na hiaa ningi, hó itavele tainkolo hóya mona odhombangi mbali ne ndatu.

²⁰Mbamava lundha, ve velela ombedhi movipathi vyeongalo, ovakwawo opo va tila okulundha.

²¹Me ku anetha kotjipala tjaKalunga notjaKristus Jesus nomovipathi vyovaengeli ovadhilikwa okutya kambulitha elongo hendi, hó kala nokapungulula nokanunu ne okuningila ovantu vamo pontyo movipuka avihe mbimo ningi.

²²Hó kanyauka okutendeka omuntu omawoko, hó litwaa modhonkali dhovantu vamo, iya liyunga, u kale omukohoki.

²³Iya mena lyokutya u na otjiteta medhimo, hó nu uke omeva aeika, iya nwa kanunu ovinyu.

²⁴Odhonkali dhovantu vamo dhi li poluhandja, madhi tenge okukoywa, iya odhavamo madhi ke ya kon̯ima.

²⁵Iya ovilinga wo oviwa vi li poluhandja, nandaku tiwa kavi moneka, kaavi ulu okuholama.