Read zemba 2 Timoteus 1 Bible Online

2 Timoteus 1 - zemba bible

2 Timoteus 1

¹Omukanda hembu mau dhi kwaame Paulus, omuyapostoli waKristus Jesus kehalo lyaKalunga, ontumwa okuhipulula omwenyo mbutwa udhikilwa moukumo naKristus Jesus.

²Me sonekele Timoteus ondele yandje omuhivilikwa. Et̯ilonkenda nolweembya nouwa waKalunga Tate nowaKristus Jesus, Muhona wetu ngau kale naove.

³Ame me pandula Kalunga, ngundji undapela, ngootateombwale hive mu undapela, andji na elityoo ndyaa kohoka. Ndji ku thipaluka momaalikano andje omutenya nout̯iku.

⁴Me thipaluka hiwa li awa etetha onkenda, mbe ku dhimbaluka ndji hala oku ku mona, opo ndji hulukwe.

⁵Me thipaluka okutya ove wa itavela tjatjili, u na eitavelo ngandyaa li nanyokomukulukadhi Loide nanyoko Eunike. Ndji tji i okutya olyo u na lyo.

⁶Iya me ku thipalukitha u kambule nawa otjali hiwa pewa kuKalunga, himbe ku tendeka omawoko.

⁷Iya Kalunga ke tu pele Ombepo yowoma, iya Ombepo yodhonkono, yohole, noyokuliyunga.

⁸Hó t̯a ohon̯i okuhipulula Muhona wetu, naame ngumba kambulwa mena lye, hó nt̯a ohon̯i. Hepa pamo naame mena lyokuteetha ondaka ombwa, Kalunga ngahi me ku pa odhonkono oku tji ninga.

⁹Kalunga we tu hupitha, ye we tu ithana, tu kale ovadhilikwa, hamena lyovilinga vyetu, iya omena lyontanto ye omwene nolyet̯ilonkenda lye ndyee tu pa otjali muKristus Jesus, tainkolo ouye háuya utwa.

¹⁰Et̯ilonkenda hendi napano lya holololwa kOmuhupithi wetu Kristus Jesus hiee ya, ngwaa han̯auna po et̯o, ha eta poluhandja omwenyo waapehe okupitila mondaka ombwa.

¹¹Iya mba holowolwa, ndji kale omuyapostoli nomulongethi nomuteethi.

¹²Ovipuka hembi vya ndjetela okutya ndji mone omaudheu, iya ame híme t̯a ohon̯i, mena lyokutya ngumba itavela ndji mu i. Ame ndji tji i okutya ye ma ulu okwaamena otjilinga himba un̯ikilwa katee ketango ndyoka lyathiinina.

¹³Kambulitha odhondaka odhombwa ndhiwa tyaa mwaame, dhi kale otjiholelwa, meitavelo nomohole ndjii li muKristus Jesus.

¹⁴Kambulitha ovipuka oviwa mbiwa pewa kOmbepo Ondhilikwa ndjii li munt̯e.

¹⁵Ove hehi u tji i okutya ovantu avehe moAsia, ngahi tji li Figelus naHermogenes, va nt̯iaa po.

¹⁶Muhona nga t̯ile onkenda onganda yaOnesiforus, mena lyokutya movikando ovingi wa ntendeleka, ye ka nt̯ile ohon̯i himba li momalyenge.

¹⁷Iya hiee ya moRoma, wa ntaendha unene, ha mbono.

¹⁸Muhona nge mu popile, a ka t̯ilwe onkenda kotjipala tjaMuhona katango me ke ya. Ove u tji i nawanawa atjihe soka Onesiforus hiaa ndingila, himba li moEfeso.