Read zemba 2 Timoteus 2 Bible Online

2 Timoteus 2 - zemba bible

2 Timoteus 2

¹Iya ove, ndele yandje, likolethela met̯ilonkenda ndii li muKristus Jesus.

²Ovipuka mbyoka mbiwa tyaa mwaame ame popi movipathi vyodhombangi odhingi, vi longa ovantu mbave tji i okuliun̯ikwa, mbamava ulu wo oku vi longa ovakwawo.

³Hepa ngomukwavita omuwa waKristus Jesus.

⁴Kape na tja omukwavita nguu litwaa mokuundapa ovipuka vye omwene, mena lyokutya u tha okuthevelwa ngwee mu twaa moukwavita.

⁵Omudhamuki auhe amave lipatele kaa pewa ondjambi, andaa kaa dhamuka wo ngahi tja tuwa po.

⁶Omunatjana nguma undapa unene, oye ma li olutenga hitje ya motjana tje.

⁷Lipula nawa ouhunga nahimbe ku heela, mena lyokutya Muhona me ke ku pa ounongo movipuka hembi avihe

⁸Thipaluka Jesus Kristus, ombuto yaDavid, ngwaa imunwa kout̯e ngahi matji popiwa mondaka ombwa ndjime teetha.

⁹Me tatethwa hindji teetha ondaka ombwa, mba kutwa ndji ngala omputji. Iya odhondaka dhaKalunga kadhi kutilwe.

¹⁰Iya me likambulithile movipuka avihe, opo ovaholowolwa vaKalunga va mone ehupitho ndii li muKristus Jesus nelaimo lyaapehe.

¹¹Ondaka hendji i tjiiwa okuliun̯ikwa ndjimai tyaa: “Iya andaa twa t̯i pamo naye, matu ka kala wo nomwenyo pamo naye.

¹²Andaa matu likambulithile, matu ka tumina wo pamo naye. Andaa matu litendele ye, naye me ke litendela nt̯e.

¹³Andaa nt̯e katuvaliun̯ikwa, ye ma kala omuliun̯ikwa, mena lyokutya ye omwene kaa ulu okulitendela.”

¹⁴Thipalukitha ovakwen̯i ovipuka hembi. Ve londola kotjipala tjaKalunga, ahamava kala amava tanguna. Omalutangu hamawa, a lundha vala ovateeleli.

¹⁵U tha okukondja ngahi mo ulu, Kalunga e ku itavele, u kale ngomuundapi nguhama t̯a ohon̯i otjilinga tje, nguu longa ovantu otjatjili hitja vyuuka tjodhondaka dhaKalunga.

¹⁶Litjaela okupopya odhondaka odhombi nomipopyo vyomawoova mbii twala vala ovantu kokule naKalunga.

¹⁷Elongo ndii li hinyahi li ngala otjiwalo tjontontola. Ovalumentu vavali mbava longa ovantu ovipuka mbyee litha hoka oHimeneus naFiletus.

¹⁸Wo va yetha ondjila yatjatjili. Va ngwangwaneka eitavelo lyovantu vamo, hiva tya eimuko kout̯e lya ningwa ae lukulu.

¹⁹Iya ekulameno ndyaa tungwa kuKalunga, lya kola, kaali tenguka. Kekulameno ndyoka kwa sonekwa odhondaka ndhimadhi tyaa: “Muhona ovantu ve u ve i,” omukwawo mau tyaa: “Auhe nguma tumbula ena lyaMuhona nga yethe oulundhi.”

²⁰Monganda onene kamu kala vala omalonga otjingoldo notjisilveri aeika, mu kala wo omatiti nodhombiya dholuma, vimo vya tumbala, vimo kavi tumbalele.

²¹Andaa omuntu we liningi nawa, ha kohoka mo movipuka ovivi, ma ulu okuundapethwa movilinga mbyaa tumbala. Omuntu nguu li nyahoka we likalekelwa, e thevelwe omuhona we. Ye we lilongekedha okuundapethwa motjilinga atjihe otjiwa.

²²Yepa omahalo omavi omatele, kondjela ouvyuuki, eitavelo, ohole nouwa pamo nambava undapela Muhona nomitima mbyaa kohoka.

²³Hó litwaa modhombata dhomawoova ndhihadhi na odhondunge, mena lyokutya u tji i okutya odhombata dhe eta vala omalutangu.

²⁴Omuntu waMuhona ka tha okutanguna, iya u tha okukala omuntu omuwa, nguu hole ovantu avehe, nguma ulu okulonga ovantu, nguu na olweembya.

²⁵Mbave mu kondjetha, nge ve pukulule nawa nonkenda, pamo Kalunga ma ulu oku ve pa oluvedhe, ve liteyulule, va iwe otjatjili.

²⁶Iya mava pukuluka, hava eta odhondunge, hava kutuluka mo momoo womudiapoli ngwee ve kutile, va undape ehalo lye.