Read zemba 2 Timoteus 3 Bible Online

2 Timoteus 3 - zemba bible

2 Timoteus 3

¹Iya tangan̯eka okutya pomatango athiinina mapa ka kala omaluvedhe omadheu.

²Iya ovantu mava ka kala ave lihole ovene, ave hole odhombongo, ovalinomi, ovalitangi. Mava ka kala ovapenyi, mbahava tee kovanene, mbahava pandula, mbahave thi ovadhilikwa.

³Wo kaava ka kala ave na ohole, kave na onkenda, owokulikumaenena, odhomputji nambava ngala ovithitu, mbave yele ouwa.

⁴Ovantu mboka mava ka kala ovalungameni, mbahave na ko natja, mbave lithela, mbave hole ovihulo poluvedhe lwokukala ave hole Kalunga.

⁵Mava ka moneka ngangumo tya va tila Kalunga, iya ve litendela odhonkono dhe. Kala kokule novantu mbave li nyahoka.

⁶Iya vamo owomovantu mboka mave ke liyombela modhonganda, hava hekele ovakadhintu mbave ulwa koulundhi, mbava alauluka mena lyomahalo awo omavi ngae lili nangae lili.

⁷Ovakadhintu hemba apehe va kala amave lilongo, atjaa kave na tango maveya iwa otjatjili.

⁸NgaJannes naJambres nawanawa hiva kondjethele Moses, ovantu hemba otjatjili kave tji hala. Ovantu hemba va ngwangwana odhondunge, kave liun̯ikile muKristus.

⁹Iya kaava vyuuka komeho, mena lyokutya omuntu auhe ma ka mona owoova wawo nawanawa ngahembunya owoJannes naJambres.

¹⁰Iya ove wa landula nawa elongo lyandje, onkalo yandje nontanto yandje. Wa ndandula meitavelo, melikambulithilo, mohole nahihe tyola,

¹¹momatatetho, movihuna mbyaa mbadha moAntiokia, moIkonium, moListra. Iya Muhona wa ntjupitha mo movipuka hembi avihe.

¹²Ovantu avehe mbamava hala okuundapela Kalunga nontilokalunga muKristus Jesus, mava ka tatethwa.

¹³Iya ovantu ovavi novalungameni mava ka ya komeho okuundapa ouvi, mava pukitha ovakwawo, nawo wo mave li pukitha.

¹⁴Iya ove kala movipuka mbyoka mbiwa longwa, mbii u i tjatjili, mena lyokutya ngwee ku longa vyo, u mu i.

¹⁵Omisonekwa omidhilikwa u vi i okudha koulele woye. Mavi ulu oku ku pa ounongo, u hupithwe okupitila meitavelo muKristus Jesus.

¹⁶Omusonekwa auhe wa sonekethwa kOmbepo yaKalunga, u na otjilinga tjokulonga otjatjili, okulondola, okupukulula nokuyulikila omuntu ondjila ndjaa vyuuka,

¹⁷omuntu waKalunga auhe opo e tjiiwe okuthevelwa otjilinga atjihe otjiwa.