Read zemba Titus 1 Bible Online

Titus 1 - zemba bible

Titus 1

¹Omukanda hembu mau dhi kwaame Paulus, omupika waKalunga nomuyapostoli waJesus Kristus, mena lyeitavelo lyovaholowolwa vaKalunga okwiiwa otjatjili tjeundapelokalunga,

²pakevelelo lyomwenyo waapehe mbwaa udhikwa kuKalunga nguha kembe, tainkolo ouye háuya utwa.

³Iya otembu hiye thiki, wa hololola odhondaka dhe meteetho ndimba pewa palaka lyaKalunga, Omuhupithi wetu.

⁴Me sonekele Titus, ondele yandje yatjatjili paitavelo lyetu limo. Et̯ilonkenda nouwa waKalunga Tate nowaKristus Jesus Omuhupithi wetu ngau kale nan̯e.

⁵Mbe ku thiaa moKreta, u vyuukithe ovipuka mbimavi hepwa okuvyuukithwa, u holowole ovanene veongalo mondolopa aihe, ngahi mbe ku heela.

⁶Omunene weongalo nga kale omuntu nguhe na ombedhi, nga kale vala nomukadhintu umo, ovana ngava kale ovaitaveli, háva kala ave hole ovipala ne ovaundapi wouvi.

⁷Iya omunene weongalo nguma t̯ile otjiho eongalo lyaKalunga, kaa thele okukala nombedhi, hamulinomi, hawokuyumana dhiva, hankolwe, hampuhi, hamunyeki movineya.

⁸Iya u tha okukala omuyakuli wovayenda, nguu undapa ouwa, nguu likambula nawa, omuvyuuki, omudhilikwa nomuliyungi.

⁹U tha okukambulitha ondaka ndjaa thele okuliun̯ikwa ngahi tja longwa, opo e tjiiwe wo okuvandhipaleka ovakwawo nelongo ewa, nokusuka mbamava tetha ombata.

¹⁰Iya pe na ovengi mbava tetha ombata, ovapopyapopi, novapukithi, unene tuu mboka mbava pita etanda.

¹¹Va tha okupatwa ovinyo, mena lyokutya va ngwangwaneka odhonganda, have ve longo mbihavya thele okulongwa, mena lyokunganyana movineya.

¹²Omuprofeti umo owomuwo Omukreta wa tile: “Ovakreta apehe odhonkembi, ovithitu, wo ve na ondende.”

¹³Omukreta hengu wa popya otjatjili. Iya mena lyanyahi, ve longa otjatjili nodhonkono, opo ve tjiiwe okukala ave li nawa meitavelo,

¹⁴ahamava landula odhongano dhOvajuda nokovitumino vyovantu mboka mbava yetha otjatjili.

¹⁵Kumbava kohoka, ovipuka avihe vya kohoka, iya kumbava sila, mbahave na tja eitavelo, kave na tja nahi tja kohoka, mena lyokutya odhondunge nelityoo lyawo lya sila.

¹⁶Wo va tya ve i Kalunga, atjaa ovilinga vyawo vi mu tendela, mena lyokutya ovatyolethi kava tee, wo kava ulu okuundapa otjilinga otjiwa notjimo.