Read zemba Titus 3 Bible Online

Titus 3 - zemba bible

Titus 3

¹Thipalukitha ovakwaneongalo woye, va tyee kovatumini nokovanene wotjilongo, ve ve tumbaleke, wo va kale amava undapa ovilinga oviwa,

²ahamava popile omuntu mouvi, ahamava kala nomalutangu, iya ngava kale nawa ave na onkenda novantu avehe.

³Iya nant̯e wo twa li ahatu na tja odhondunge, nahi katu tee, twa pukile, twa li ovapika womahalo ngae lili nangae lili. Twa kala monkalamwenyo yonki noyouvi, twe litoyele pokati.

⁴Iya ouwa waKalunga Omuhupithi wetu nohole yokuhola ovantu hiye ya,

⁵Kalunga we tu hupitha hamena lyovilinga vyouvyuuki mbitwa undapa ngaile, iya oket̯ilonkenda lye, kekoho lyeyumukululo nolyetjitululo lyOmbepo Ondhilikwa,

⁶ndjaa uyulila munt̯e on̯ingi muJesus Kristus, Omuhupithi wetu,

⁷okutya twa vyuukithwa ket̯ilonkenda lye, tu ule okukala odhompinga dhomwenyo waapehe pakevelelo.

⁸Ondaka hendji oyatjatjili. Iya me hala u longe ovipuka hembi nodhonkono, opo mboka mbava itavela muKalunga, va kambulithe tjatjili okuundapa ouwa. Ovipuka hembi oviwa, vyo mavi popile ovantu.

⁹Iya henuka odhombata dhowoova nokuhava odhondumevelo dhomaanda, omalutangu novilwa ouhunga noveta. Iya ovipuka hembi kavi na tjilinga vyo kavi na himavi popile.

¹⁰Omuntu nguma eta omaliyapauko mu pukulula tumo ne tuvali, andaa katji na himatji popile, mu yetha.

¹¹Iwa okutya omuntu nguu li nyahoka wa lundha, ye we likoya omwene.

¹²Andaa mba tumu Artemas ne Tikikus kwoove, indjo dhiva kwaame koNikopolis, mena lyokutya mba tokola oko ndji ka kala pompepela.

¹³Senas, omulongiveta, naApollos ve lekela, ove u ve longekedhe nawa, va kale ave na atjihe himava hepwa.

¹⁴Ovantu vetu nawo ngave lilonge wo okuundapa ouwa, va popile mpape na oluhepo, opo hava kala have na himava ningi.

¹⁵Mbave li pwaame avehe mave ku menekele po. Menekela po mbave tu hole meitavelo. Et̯ilonkenda ngali kale nan̯e amuhe.