Read zemba Ovaheberi 1 Bible Online

Ovaheberi 1 - zemba bible

Ovaheberi 1

¹Lukulu Kalunga wa popile nootateombwale otwingi modhonkalo odhingi okupitila movaprofeti.

²Iya pomatango henga athiinina we tu popitha okupitila mOmuna ngoka Kalunga ngwaa utitha ouye, novipuka avihe pomaandelo mavi ka ninga ovye.

³Omuna u na elaimo lyetumbalo nolupe lwaKalunga omwene. Omuna ma takametha euto alihe kodhonkono dhondaka ye. Ye hiaa koha odhonkali, wa kala pohi kokulyo kwoMutumbalekwa meulu.

⁴Omuna wa ningwa omunene okupon̯a ovaengeli, ngena lye Kalunga ndyee mu luka hili li enene okupon̯a oawo.

⁵Iya Kalunga ke na mpaa heelele omweengeli noumo ha tyaa: “Oove omunwandje, iya ndino ame mba ile Iho.” Ye ke na uke ngwaa heelele ha tyaa: “Ame me ka ila ihe, ye ma ka ila omunwandje.”

⁶Iya Kalunga hiaa tuma Omuna, tjiveli tje, mouye, wa popya ha tyaa: “Ovaengeli vaKalunga avehe ngave mu tumbaleke.”

⁷Kalunga wa popya ouhunga novaengeli ha tyaa: “Ovaengeli ve me ve ningi odhombepo, novantu ve me ve ningi omalakulaku omulilo.”

⁸Iya ouhunga nOmuna wa popya ha tyaa: “Kalunga, otjipunditumino tjoye matji kala apehe katee apehe. Otjilongo tjoye mo tji tumine nouvyuuki.

⁹Ove u hole ouvyuuki, u yele oulundhi. Iya Kalunga, Kalunga koye we ku holowola. We ku vaveka omadhi, he ku hulukitha, nehuluko enene okupon̯a ovakwen̯i.”

¹⁰Ouhunga nOmuna wa popya uke ha tyaa: “Muhona, ove pomautilo wa uta omakulameno ohi, eulu ovilinga vyomawoko oye.

¹¹Vyo mavi ka anda, iya ove opo mo kala. Vyo avihe mavi ka kulupa ngotjitopa.

¹²Mo ke vi t̯ita ngotjitopa, mavi ka kundjuka wo ngotjitopa. Iya ove odhombula dhoye kaadhi ka anda, mo ka kala ngahi u li.”

¹³Kalunga ke na mpaa heelele omweengeli noumo ha tyaa: “Kala pohi kokulyo kwandje katee me ningi odhondjedhi dhoye otjilyatelo tjodhompadhi dhoye.”

¹⁴Ovaengeli owaan̯i? Ovaengeli avehe odhombepo ndhii undapela Kalunga, dho ndhii tumwa kuKalunga okupopila ovantu mbamava ka hupithwa.