Read zemba Ovaheberi 10 Bible Online

Ovaheberi 10 - zemba bible

Ovaheberi 10

¹Oveta yOvajuda otjidhidhimbe tjovipuka oviwa mbimavi ya, olupe halo lu li ovipuka ovyenevyene. Iya oveta kaai ulu okuthikitha ovantu mehwilopo nandava hweene kuKalunga nomayambo awo apehe ombula nombula.

²Ngaile ovantu hembenya va kohwa odhonkali dhawo, ngai kave na tja omalityoo odhonkali, nomayambo ngai kaa hepwa uke.

³Iya omayambo henga a kalela po okuthipalukitha ovantu odhonkali dhawo ombula nombula.

⁴Iya ombindhi yodhontwedhi noyodhonkombo kaai ulu okwiitha po odhonkali.

⁵Iya Kristus hiaa li ame ya mouye, wa heela Kalunga ha tyaa: “Otjali nomayambo koo e hala, iya wa ndongekedhela olutu.

⁶Omalungwinithwayambo nomayambo okwiitha po odhonkali koo e hulukilwa.

⁷Ame he tyaa: ‘Aame hengu, me ya okuundapa ehalo lyoye, Kalunga, ngahi tja sonekwa membo lyoveta, himatji popi ouhunga naame.’ ”

⁸Olutenga Kristus wa popya ha tyaa: “Otjali nomalungwinithwayambo nomayambo okwiitha po odhonkali ku e hala, ove ku e hulukilwa.” Wa popya hinyahi nandaku tiwa oveta mai popi omayambo a yambelwe.

⁹Iya wa popya uke ha tyaa: “Aame hengu, me ya okuundapa ehalo lyoye, Kalunga.” Iya Kalunga wa itha po eyambo lyolutenga, ha twaa po eyambo etyavali.

¹⁰Iya mena lyokutya Jesus Kristus wa ninga soka Kalunga hiaa li ama hala a ninge, nt̯e atuhe twa kohwa odhonkali, hiee liyamba nolutu lwe otjikando tjimo vala.

¹¹Omuyambethi auhe u kulama etango alihe okuundapa otjilinga tje, u yamba omayambo ngoka ovikando ovingi. Omayambo atjo ngoka kae na tango a ithile po odhonkali.

¹²Iya omuyambethi hengu Kristus hiaa yamba eyambo otjikando tjimo vala mena lyodhonkali, wa kala pohi kokulyo kwaKalunga katee apehe.

¹³Napano hoka Kristus oko ma kevelele, katee Kalunga ma twaa odhondjedhi dhe kohi yodhompadhi dhe.

¹⁴Iya neyambo limo vala wa hwithila po apehe katee apehe mboka mbava ningwa ovadhilikwa.

¹⁵Ombepo Ondhilikwa mai tu hipululile wo okutya olutenga Kalunga ma tyaa:

¹⁶“Hendi olyo li li ewaneneno ndime ka ninga nawo kon̯ima yomatango ngoka, Muhona otjo ma popi. Oveta yandje me ke i twaa momitima vyawo, he ke i sonekela momalipulo awo.”

¹⁷Wa popya uke ha tyaa: “Híme ka thipaluka uke odhonkali novilinga vyawo ovivi.”

¹⁸Avihe hembi avya ithwa po, kaapa hepwa uke omayambo okwiitha po odhonkali.

¹⁹Vakwetu, napano tu na oluvedhe ndwaa kutuluka okuhita moudhilikwadhilikwa mena lyet̯o lyaJesus.

²⁰Jesus we tu patululila ondjila ompe yomwenyo okupitila motjiyuvikilo, okutya okupitila molutu lwe omwene.

²¹Iya tu na omuyambethi omunene nomuyungi wonganda yaKalunga.

²²Ngatu hweene puKalunga nomutima watjatjili mbuu na eliun̯iko lyeitavelo, nomitima mbyaa tjatjwa okudha melityoo lyouvi, nolutu ndwaa kohwa nomeva ngaa kohoka.

²³Ngatu kambulithe otjihipululo tjekevelelo lyetu, hátu tengauka. Iya ngwee tu pa eudhiko omuliun̯ikwa.

²⁴Ngatu lit̯ilen̯i otjiho, nt̯e tu livandhipaleke, tu kale atu lihole, nt̯e tu liningile ouwa.

²⁵Hátu yetha okwoongana pamo, ngavamo hiva yetha okwoongana pamo. Iya ngatu livandhipaleke, unene hitu lwete etango lyaMuhona himali hweene popedhi.

²⁶Iya andaa matu lundhile tjawina, nt̯e opo twa dhi pokutyaa otjatjili, kaapa kala uke eyambo lyokwiitha po odhonkali.

²⁷Iya matu kevelele vala ekoyo ndimali tilitha, nekundungala lyomulilo ndimali hike mbamava kondjetha Kalunga.

²⁸Omuntu nguha tee koveta yaMoses, u dhipawa ahape na tja onkenda, andaa hiaa lundha tja popiwa kodhombangi mbali ne ndatu.

²⁹Mamu lipula vi, oluyuma ndoka malu ka kala alu lithike pi kunguma tombo OmunwaKalunga, ha tala okutya ombindhi yewaneneno ndjee mu dhilika kai na otjilinga, atjaa ha penye Ombepo yet̯ilonkenda?

³⁰Iya nt̯e tu mu i ngwaa popya ha tyaa: “Ame me kambulile ovantu onkongo, aame omwene me ke ve yumaneka.” Ma tya uke: “Muhona ma ka koya ovantu ve.”

³¹Tjitilitha okuwila momawoko aKalunga omunamwenyo.

³²Iya thipaluken̯i omatango alukulu, himwa tungatelelwe notjiten̯i tjaKalunga, mwe likambulithilile ekondjo enene lyomatatetho.

³³Poluvedhe lumo mwa penyenwe, hamu tatethwa movipathi vyovantu, poluvedhe olukwawo mwa ila omapanga nambava tatethwa ngan̯e.

³⁴Iinga, iya mwa ihamekwa pamo nodhonkwatwa, hamu likambulithile nehuluko himwa pundwa omamona en̯i. Iya omena lyokutya mu tji i okutya mu na tjimo otjiwa hihamatji anda.

³⁵Iya hámu yetha eliun̯iko lyen̯i, mena lyokutya eliun̯iko li na ondjambi onene.

³⁶Mamu hepa okulikambulithila, opo mu hwithile po ehalo lyaKalunga, n̯e mu pewe soka hiee mu udhikila.

³⁷Iya omusonekwa mau tyaa: “Pe na vala okaluvedhe okanunu, ngoka ngwaa thele okuya, me ya, ye kaa kala ko.

³⁸Iya omuvyuuki wandje ma ka kala nomwenyo mena lyeitavelo, iya andaa ma tjuna mon̯ima, omwenyo wandje kaau mu hulukilwa.”

³⁹Iya nt̯e katu ngala ovantu mboka mbava tjuna mon̯ima, va ka keke, iya matu itavele, omienyo vyetu vi hupithwe.