Read zemba Ovaheberi 13 Bible Online

Ovaheberi 13 - zemba bible

Ovaheberi 13

¹Ovakriste twikilen̯i okukala amu lihole.

²Hámu dhimbi okuyakula odhongendi. Pe na vamo mbava ningile nyahoka, hava yakula ovaengeli, wo ahave tji i.

³Thipaluken̯i odhonkwatwa, mu ngale mbamwa kambulwa pamo nawo. Thipaluken̯i mbava monethwa ovihuna, mu ngale mbamwa monethwa ovihuna pamo nawo.

⁴Olukupo ngalu tumbalekwe kovantu avehe. Ngwaa kupa nangwaa kupwa, auhe nge liun̯ike momukwawo. Iya Kalunga ma ka koya mbave li movihulo, nambava yona olukupo.

⁵Monkalamwenyo yen̯i hámu kala nolwiho nodhombongo, himu na tjo ngatji mu hule, mena lyokutya Kalunga ma tyaa: “Ame híme ku yetha nokanunu, híme ku thii po.”

⁶Iya ngatu kalen̯i atu na eliun̯iko, nt̯e tu tye: “Muhona oye e li omupopili wandje, hí na hime tila, omuntu ma ndingi tji?”

⁷Thipaluken̯i ovaviyuli ven̯i, mbave mu heela ondaka yaKalunga. Lipulen̯i onkalo yawo okutya ya li vi, n̯e mu holele eitavelo lyawo.

⁸Jesus Kristus ka lunduluka, hiaa li ongulohi, otjo e li nandino katee apehe.

⁹Hámu twalwatwalwa komalongo ngae lili nangae lili, ngahamu i. Iya onawa omutima u kolekwe ket̯ilonkenda lyaKalunga, hakoveta yovikulya ndjaa tuwa po, oveta yovikulya kaai popile mboka mbave vi lya.

¹⁰Ovayambethi mbava undapa mesase mumu undapelwa Kalunga, kave na tja odhonkono okulya kotjiyambelo tjetu.

¹¹Omuyambethi omunene, Omujuda, u eta ombindhi yovipako moudhilikwadhilikwa, opo e i yambe mena lyodhonkali. Iya omituntu vyovipako vi hikilwa kotjila tjokamba.

¹²Iya naJesus wo wa t̯ila kotjila tjotjivelo tjotjitungwalongo, opo a kohe po odhonkali dhovantu nombindhi ye omwene.

¹³Iya nant̯e ngatu enden̯i kuye kotjila tjokamba, tu ka penywe pamo naye.

¹⁴Iya kombanda yohi katu na ko otjitungwalongo himatji kalakala ko, iya matu taendha otjitungwalongo himatji ya.

¹⁵Ngatu yamben̯i Kalunga apehe eyambo lyompandu, okupitila muJesus, iya okuhipulula ena lye otjo tji li eyambo lyovinyo vyetu.

¹⁶Hámu dhimbi okuundapa ouwa nokuliyandjela mbimu na vyo, mena lyokutya omayambo ngae li nyahoka, mae hulukitha Kalunga.

¹⁷Tyeen̯i kovaviyuli ven̯i, n̯e mu landule himava popi. Va t̯ila omienyo vyen̯i otjiho, kava thuva, mena lyokutya mave ke vi pulwa kuKalunga. Andaa mamu ve tee, wo mava undapa nawa ovilinga vyawo, iya andaa kaamu ve tee, mava undapa noluyuma okutya nyahoka katji na himatji mu popile.

¹⁸Iya tu kumbilen̯i. Nt̯e tu na omalityoo omawa, matu hala okweenda nawa movipuka avihe.

¹⁹Ame, unene me hala oku mu ilikin̯a, mu nkumbile, opo Kalunga a ntume uke kun̯e dhiva.

²⁰Iya Kalunga kouwa, wa imuna kout̯e Muhona wetu Jesus, omut̯ita omunene wodhondhu okupitila mombindhi yewaneneno lyaapehe.

²¹Iya Kalunga nge mu pe ouwa auhe, opo mu undape ehalo lye. Kalunga nga undape munt̯e tu mu thevelwe okupitila muJesus Kristus, ye nga tumbalekwe apehe katee apehe. Amen.

²²Iya vakwetu me mu ilikin̯a, likambulithilen̯i hime mu ilikin̯a, mena lyokutya mbe mu sonekela vala pauthupi.

²³Me mu heele okutya omukwetu Timoteus wa dhi mo mokaliwoso, andaa we ya dhiva, matu ya naye tu mu valulile po.

²⁴Menekelen̯i po mbave mu viyula avehe, n̯e mu menekele po ovadhilikwa avehe. Menekelen̯i po ovakriste vakwetu mbava dha koItalia.

²⁵Et̯ilonkenda lyaKalunga ngali kale nan̯e amuhe.