Read zemba Ovaheberi 2 Bible Online

Ovaheberi 2 - zemba bible

Ovaheberi 2

¹Iya twa thele okulitwaa mo unene musoka hitu yuvite, opo hátu i novithithi.

²Iya etumwalaka ovaengeli ndiva eta, olyatjatjili. Auhe nguhe li landulile, ahame li itavele, wa yumanekwa ngahi a hala.

³Iya nt̯e matu inkolo vi, andaa nan̯i katu na ko natja nehupitho enene ndii lithike hempa? Ehupitho hendi olutenga twe li heelwa kuMuhona, okudha mpoka hali kolekwa kumbave lityaa muye, have tu heele okutya otjatjili.

⁴Kalunga wa wedha ko oumbangi we koumbangi wawo, hiaa undapa ovilingatangan̯eko novilingakumithi novilingankono ovingi. Ye wa yandja wo otjali tjOmbepo Ondhilikwa, omwene ngahi ma hala.

⁵Iya ouye mbumau ya, mbutu popya, ke u twiile metumino lyovaengeli.

⁶Iya pe na okaluvedhe kamo momisonekwa, umo mpaa popya ha tyaa: “Omuntu otjitji, hiuu mu thipaluka, nomuna womuntu hiuu mu t̯ila otjiho?

⁷We mu ninga omununu okaluvedhe okanunu okupon̯a ovaengeli. We mu pa elaimo netumbalo ngohamba,

⁸ovipuka avihe we vi twaa kohi yodhompadhi dhe.” Kalunga wa uta omuntu a ile omutumini wovipuka avihe. Kalunga ke na hiha twiile kohi yetumino lyomuntu. Iya nt̯e katee napano katu mono okutya omuntu omutumini wovipuka avihe.

⁹Iya nt̯e tu mona Jesus ngwaa nunupikwa okaluvedhe okanunu okupon̯wa kovaengeli, wa pewa elaimo netumbalo mena lyomatatetho et̯o, opo a lole et̯o poluvedhe lwovantu avehe ket̯ilonkenda lyaKalunga.

¹⁰Iya tja li nawa kuKalunga, ngwaa uta ovipuka avihe, nguu takametha ovipuka avihe, wa hwithila po Jesus okupitila momatatetho, opo a ete ovana ovengi melaimo. Jesus oye e li ohongodhi yehupitho.

¹¹Iya nguu ninga ovantu va ile ovadhilikwa nambava ningwa ovadhilikwa, avehe va dha muumo, mena lyanyahoka kaa t̯i ohon̯i oku ve ithana ovanitje,

¹²hima tyaa: “Ena lyoye me hala oku li heela ovakwetu, nomokati keongalo me ku imbile omaimbilo.”

¹³Ye ma tya wo uke: “Mbe liun̯ika muKalunga.” Ye ma tya uke: “Aame hengu nodhondele mboka Kalunga mbaa mpa.”

¹⁴Ngodhondele hive na olutu nombindhi, naJesus wo wa ya kumo nawo monkalo yatjo ndjoka imo, opo mena lyet̯o lye a han̯aune po omudiapoli nguu eta et̯o,

¹⁵ye a kutulule ovantu avehe mbava li moupika wowoma wet̯o monkalamwenyo yawo aihe.

¹⁶Iya Jesus ke dhile okupopila ovaengeli, iya omusonekwa mau tyaa: “Ma popile oluyumuko lwaAbraham.”

¹⁷Iya mena lyanyahoka wa li ae na okulitha kovakwawo movipuka avihe, opo a ile omuyambethi omunene wonkenda, omuliun̯ikwa movilinga vye puKalunga, opo a ithe po odhonkali dhovantu.

¹⁸Iya ye omwene hiaa lolwa, ha tatethwa, ma ulu okupopila mboka mbamava lolwa.