Read zemba Ovaheberi 3 Bible Online

Ovaheberi 3 - zemba bible

Ovaheberi 3

¹Iya vakwetu ovadhilikwa, mbamwa ithanwa kuKalunga, tween̯i omalipulo en̯i momuyapostoli nomuyambethi omunene ngutu hipulula, nguu li Jesus.

²Ye wa li omuliun̯ikwa kungwee mu twaa po, ngaMoses hiaa li wo omuliun̯ikwa monganda yaKalunga aihe.

³Jesus wa talwa okutya u na etumbalo enene okupon̯a Moses, ngomutungi wonganda hiee na etumbalo enene okupon̯a onganda oyene.

⁴Iya onganda aihe i na ngwee i tunga, iya Kalunga oye e li omutungi wovipuka avihe.

⁵Moses wa li omuliun̯ikwa wonganda yaKalunga aihe ngomupika, wa popya ovipuka mbimavi ka popiwa kuKalunga komeho.

⁶Iya Kristus ngOmuna oye e li omuliun̯ikwa monganda yaKalunga. Ont̯e tu li onganda yaKalunga, andaa matu kambulitha nouvandhi, hatu liun̯ike muhimatu kevelele.

⁷Iya ngOmbepo Ondhilikwa himai tyaa: “Ndino hendi, amwa tee ondaka yaKalunga,

⁸hámu kukutike omitima vyen̯i ngahi mwa ningile, himwe mu kondjethele moluvedhe hendunya himwa li mokuti amamu mu lolo.

⁹Mokuti moka owoihoombwale muva ndevele, hava ndolo, nandaku tiwa va mona ovilinga vyandje odhombula omilongo vine.

¹⁰Iya otjo mba li amba yumanekele ekula hendinya, he tyaa: ‘Omalipulo awo aehe a puka, wo odhondjila dhandje kave dhi i.’

¹¹Ame mena lyoluyuma mba ana, he tyaa: ‘Wo moluthuwo lwandje kaava hiti mo.’ ”

¹²Vakwetu! Lungamen̯i, háku kala omuntu noumo mun̯e nguma kala nomutima omuvi mbumau yetha eitavelo, ye ha yetha Kalunga omunamwenyo.

¹³Iya livandhipaleken̯i etango alihe, tainkolo maku tiwaa: “Ondino,” opo hápa kala omuntu noumo nguma kembelwa po koulundhi, e likukutike.

¹⁴Iya nt̯e tuvaKristus, andaa matu kambulitha eliun̯iko lyetu ndyoka nditwa uta nalyo katee komaandelo.

¹⁵Omusonekwa mau tyaa: “Ndino hendi, amwa tee ondaka yaKalunga, hámu kukutike omitima vyen̯i ngahi mwa ningile himwe mu kondjethele.”

¹⁶Owaan̯i mbava teele ondaka yaKalunga, atjaa wo have mu kondjetha? Hawomboka avehe mbava dhilulwa kuMoses okudha moEgipiti?

¹⁷Owaan̯i mbava yumanekelwe oule wodhombula omilongo vine? Hawomboka mbava lundha, hava t̯ile mokuti?

¹⁸Kalunga wa anenene owaan̯i okutya moluthuwo lwe kaava hiti mo? Hawomboka mbahava tee?

¹⁹Iya napano twa mono okutya, kava ulile okuhita mo, mena lyokuhaitavela.