Read zemba Ovaheberi 4 Bible Online

Ovaheberi 4 - zemba bible

Ovaheberi 4

¹Iya ngatu tile, tainkolo eudhiko okuhita moluthuwo lwe opo li li katee hempa, opo hápa kala omuntu noumo mun̯e nguma hulile pokati.

²Iya nt̯e twa tyaa eteetho lyondaka ombwa ngawo wo hive i tyaa. Iya napano eteetho lyondaka ndjiva tyaa, kali na hilye ve popila, mena lyokutya kave i tambulile neitavelo.

³Iya nt̯e mbatwa itavela, matu hiti moluthuwo, Kalunga ngahiaa udhika. Kalunga ngahi ma tyaa: “Ame mena lyoluyuma mba ana, he tyaa: ‘Wo moluthuwo lwandje kaava hiti mo.’ ” Kalunga nandaku tiwa ma popi hinyahi, ovilinga vye vya pwa, hiaa uta ouye.

⁴Iya pamo momisonekwa mwa popiwa hinyahi ouhunga netango etyapanduvali: “Kalunga wa thuva etango etyapanduvali kovilinga vye avihe.”

⁵Iya nahempa uke maku tiwaa: “Wo moluthuwo lwandje kaava hiti mo.”

⁶Iya pe na vamo mbamava hiti moluthuwo lwe, iya mboka mbava teethelwa olutenga ondaka ombwa kava hitile mo, mena lyokutya kava itavelele.

⁷Iya Kalunga wa twaa po uke etango limo ndii tiwa Ondino. Kon̯ima hipa piti odhombula odhingi, Kalunga wa popya okupitila muDavid, ha tyaa: “Ndino, amwa tee ondaka ye, hámu kukutike omitima vyen̯i.”

⁸Iya Josua ngaile wa thikitha otjiwan̯a moluthuwo, ngai Kalunga ká ka popile uke etango ekwawo komeho.

⁹Iya ku na uke oluthuwo lwEsabati kovantu vaKalunga komeho.

¹⁰Iya ngwaa hita moluthuwo lwe, ma thuva kovilinga vye, ngaKalunga hiaa thuva kovilinga vye.

¹¹Iya ngatu kondje okuhita moluthuwo ndoka. Hápa kala omuntu noumo munt̯e nguma yetha Kalunga, a holele hembenya mbahava itavelele Kalunga.

¹²Iya odhondaka dhaKalunga dhi na omwenyo, dho dhi na odhonkono, dha twa okupon̯a omukonda mbwaa twa kuvali. Dhi teta, hadhi yapula pomawaneneno omwenyo nombepo, odhongolo nomongo. Dhi hololola poluhandja omahalo nomalipulo omomutima.

¹³Kape na tja notjimo hitja holekwa Kalunga. Atjihe meuto tji li poluhandja kotjipala tjaKalunga, ngoka ngumatu ka hipululila ovipuka avihe mbitwa ninga.

¹⁴Iya hitu na omuyambethi omunene, ngwaa yatakana eulu, nguu li Jesus, OmunwaKalunga, ngatu kalen̯i atwa kolo meitavelo nditu hipulula.

¹⁵Omuyambethi wetu omunene haye hengu, nguhe yuvitile oungone wetu onkenda, iya oye ngoka ngwaa lolwa movipuka avihe, atjaa ka lundhile.

¹⁶Ngatu enden̯i kotjipunditumino tjonkenda yaKalunga atu na eliun̯iko, hoka humaku moneka onkenda nolweembya ndumalu tu popile moluvedhe oluwa.