Read zemba Ovaheberi 7 Bible Online

Ovaheberi 7 - zemba bible

Ovaheberi 7

¹Melkisedek hengu wa li ohamba yaSalem nomuyambethi waKalunga Owokombandambanda. Abraham hiaa li ama dhi kovita hoka hwaa ton̯a odhohamba, Melkisedek wa wanena naye, he mu pa elao.

²Abraham wa pa Melkisedek otjityamulongo tjomovipuka vye mbyoka mbyaa tjun̯a. Ena hendi Melkisedek olutenga mali tyaa: “Ohamba youvyuuki”, iya mena lyokutya wa li ohamba yaSalem, ena lye mali tyaa uke: “Ohamba youwa.”

³Melkisedek hengu ke na ihe, ye ke na ina, ye ke na tja eanda, kaku tumbulilwe wo okuyumukwa kwe ne et̯o lye. Iya wa yelekwa nOmunwaKalunga okutya ma kala omuyambethi katee apehe.

⁴Iya mu lwete okutya Melkisedek wa li omuntu omunene. Iya tateombwale Abraham we mu pa otjityamulongo tjomovipuka avihe mbyaa tjun̯a kovita.

⁵Ovayambethi avehe womoluyumuko lwaLevi va heelwa koveta, va ongedhe otjityamulongo mOvaisraeli, ve tji ongedha movawo, nandaku tiwa owomoluyumuko lwaAbraham.

⁶Melkisedek ye omwene kaa li owomoluyumuko lwaLevi, iya wa pewa otjityamulongo kuAbraham, ye ha yandja elao kuAbraham ngwaa pewa omaudhiko kuKalunga.

⁷Kape na tja nguma tetha ombata, omununu okupewa elao komunene.

⁸Iya hempa ovayambethi mbava ongedha ovityamulongo, va t̯a, iya Melkisedek u na omwenyo, omusonekwa ngahi mau popi.

⁹Abraham hiaa yandja otjityamulongo, owomoluyumuko lwaLevi nawo wo va yandja.

¹⁰Iya Abraham hiaa wanena naMelkisedek, nahi Levi keya yumukwa.

¹¹Iya Ovaisraeli moveta va thele okukambulitha ouyambethi woyaLevi. Ovilinga vyovayambethi Ovalevi ngaile vya li avya hulu, ngai mapa hepa uke omuyambethi umo, e ye ngahi tja li molenda yaMelkisedek, ahame ya ngahi tja li molenda yaAron?

¹²Iya mouyambethi amamu lunduluka, nomoveta wo mu tha okulunduluka.

¹³Iya Muhona wetu nguu popilwa movipuka hembi, ye owomeanda ndii lili. Meanda lye kape na umo ngwaa li notjilinga tjouyambethi.

¹⁴Iya tji iwe nawa okutya Muhona wetu wa dha meanda lyaJuda, ndyoka Moses ndiha tumbulile, hiaa popya ovayambethi.

¹⁵Iya napano tja kohoka nawa unene okutya pe ya omuyambethi umo ngaMelkisedek.

¹⁶Ye ka ningilwe omuyambethi kondaka yoveta yountu, iya okodhonkono dhomwenyo mbuhau anda.

¹⁷Iya omusonekwa mau tyaa: “Oove omuyambethi katee apehe ngahi tja li molenda yaMelkisedek.”

¹⁸Iya oveta onkulu ya ithwa po, mena lyokutya onkundi, kai na tja otjilinga.

¹⁹Iya oveta yaMoses kai na hiya hwithila po. Poluvedhe lwoveta pa tuwa eliun̯iko ewa, mulyo matu hweene kuKalunga.

²⁰Iya hehi hitja ningwa, Kalunga wa ana, iya nahi lukulu ovayambethi amava tuwa motjilinga, kaku anwa.

²¹Iya Kalunga hiaa ninga Jesus a ile omuyambethi, wa ana. We mu heela ha tyaa: “Muhona wa ana, kaa lundulula omalipulo e ngamaa tyaa: ‘Oove omuyambethi katee apehe.’ ”

²²Iya mena lyeano hendi Jesus wa ila wo opinyolo yewaneneno ewa, ndyaa pon̯a hendinya.

²³Iya lukulu kwa li ovayambethi ovengi, atjaa kava ulile okutwikila otjilinga tjawo mena lyokutya va t̯a.

²⁴Iya Jesus u na omwenyo katee apehe, nouyambethi we kau lunduluka.

²⁵Ma ulu okuhupitha mboka mbamave ya kuKalunga okupitila muye, mena lyokutya u na omwenyo apehe, me ve kumbile.

²⁶Iya omuyambethi omunene nguu li hinyahi, oye e tu thevelwa wo, omudhilikwa, nguhe na ombedhi, ngwaa kohoka, ngwaa yapulwa movalundhi, ngwaa ningwa omunene, ha yelelwa peuluulu meulu.

²⁷Jesus kaa hepa okuyamba ngovayambethi ovanene vamo mbava yamba omatango aehe, olutenga va yamba mena lyodhonkali dhawo ovene, okudha mpoka odhovantu vamo. Iya Jesus wa yamba eyambo otjikando tjimo vala, hiee liyandja omwene kuKalunga a ile eyambo.

²⁸Ovantu mboka mbava holowolwa va ile ovayambethi moveta yaMoses, va li ovingone. Iya okwaana kwaKalunga hukwa ka ningwa kon̯ima yoveta yaMoses, kwa twaa po Omuna ngwaa hwila po katee apehe.