Read zemba Ovaheberi 9 Bible Online

Ovaheberi 9 - zemba bible

Ovaheberi 9

¹Ewaneneno lyolutenga lya li wo nodhoveta dhokuundapela Kalunga noluvedhe ndwaa ningilwa okuundapela Kalunga.

²Iya esase lya tungilwe hinyahi: Ondjuwo yokuthikila, ndjii tiwa ondhilikwa, mwa li otjituliko tjolamba, otjitaafula nomingome mbyoka mbii yambwa Kalunga,

³iya kon̯ima yotjitopa otjityavali hitji yuvikila, kwa li ondjuwo ndjii tiwa ondhilikwandhilikwa,

⁴mumwa li otjiyambelo tjotjingoldo tjokutwiimin̯ina, notjikasa tjewaneneno hitja vavekwa otjingoldo kodhontyo adhihe. Motjikasa tjewaneneno mwa li ombiya yotjingoldo ndjii na omanna, mwa li otjisawa tjaAron hitja tauka oluhapo, novipelende vyomawe vivali mbyaa sonekwa ovitumino.

⁵Kombanda yotjikasa tjewaneneno kwa li ovakerubi mbava hambulwa, mbave na elaimo. Omavava awo a tjikila oluvedhe mpoka odhonkali mpadhi ithilwa po. Iya kaatu ulu okuthitulula nawa ovipuka hembi avihe napano.

⁶Iya ovipuka hembi avya longekedhwa nyahoka, ovayambethi va kala amava i etango alihe mondjuwo yokuthikila oku ka undapa ovilinga vyouyambethi.

⁷Iya mondjuwo ontyavali mu hita vala omuyambethi omunene aika otjikando tjimo mombula. Ye u hita mo nombindhi, e i yambe Kalunga mena lyodhonkali dhe omwene nodhovantu ndhihava ningilile owina.

⁸Momalongekedho henga aehe Ombepo Ondhilikwa i holololele ovantu okutya ondjila yokuhita moudhilikwadhilikwa kaiya patululwa, tainkolo esase lyolutenga opo li li.

⁹Hendi olyo li li ethano ndimali yulike oluvedhe lwanapano, matji tya, ovipuka vyotjali nomayambo ngaa yambwa Kalunga kaa ulu okuninga elityoo lyomuundapelikalunga li kale alya hwile po okupwa.

¹⁰Iya ngahi tji li ovikulya novikunwa nokulikoha huku lili nahuku lili, mbyoka oveta yountu, ndjaa tuwa po, i kale po katee oluvedhe lwoveta ompe malu ya.

¹¹Iya Kristus hiaa ninga omuyambethi omunene, we ya ae na ouwa auhe wovipuka mbitu lwete. Esase moka mwaa undapela, enene unene, lyo ewa okuhwila po, kali tungilwe nomawoko ovantu, lyo halyomeuto hendi.

¹²Kristus wa hita moudhilikwadhilikwa otjikando tjimo vala, ka hitile mo nombindhi yodhonkombo ne yodhontana, iya wa hita mo nombindhi ye omwene, he tu undapele eyowolo lyaapehe.

¹³Ombindhi yodhonkombo noyodhontwedhi i sapelwa ovantu mbava lundha, hava undwa nomuto wontana ondema, vyo havi ve koho osilo yawo.

¹⁴Iya unene ombindhi yaKristus ya hula, mai kohola omalityoo etu kovilinga ovivi, opo tu undapele Kalunga omunamwenyo. Iya Kristus we liyamba omwene kuKalunga kodhonkono dhombepo yaapehe, a ile eyambo ndihali na ombedhi.

¹⁵Iya wa ila omuwan̯en̯eki wewaneneno epe, ovaithanwa opo va mone oumpinga waapehe mbwaa udhikwa, mena lyokutya et̯o lye lya ila ondjowo yodhonkali dhewaneneno lyolutenga.

¹⁶Iya mpape na eudhiko lyepingo, omuntu nguma pinganwa u tha okukala ae iwe tjatjili okutya wa t̯i,

¹⁷mena lyokutya eudhiko lyepingo kali na tjilinga, tainkolo omupinganwa aheya t̯a, u pinganwa vala, aa t̯i.

¹⁸Iya ewaneneno lyolutenga kaali ulu okuningwa ahape na tja ombindhi.

¹⁹Olutenga Moses wa heela ovantu avehe ovitumino vyomoveta, okudha mpoka ha itha ombindhi yodhontana noyodhonkombo nomeva, ha itha omaenya omathilantu notjiyawo tjomusopi, ha sapele embo lyoveta novantu avehe,

²⁰ha tyaa: “Ombindhi hendji oyo i li ewaneneno ndyoka Kalunga ndyee mu heela mu li kambulithe.”

²¹Iya esase novimbundu avihe mbii undapethwa meundapelokalunga navyo we vi sapela.

²²Iya ambala ovipuka avihe vi oveta ngahi mai popi, vi kohwa nombindhi. Odhonkali dhi ithwa po vala, apa tika ombindhi.

²³Ovipuka hembi vyokombanda yohi omathano ovipuka vyomeulu, vya thele okukohwa nomayambo henga, iya ovipuka vyomeulu mavi kohwa nomayambo ngaa pon̯a henga.

²⁴Iya Kristus ka hitile moudhilikwa mbwaa tungwa kovantu, mboka mbuu li ethano lyoudhilikwa owenewene. Ye wa hita meulu olyenelyene, moka mume tu popile kotjipala tjaKalunga,

²⁵hakutya e ke liyambe uke ngomuyambethi omunene hiaa hita moudhilikwadhilikwa otjikando tjimo mombula, u hita mo nombindhi ndjihai thi oye.

²⁶Iya ngaile katja li nyahoka, ngai wa tatethwa ovikando ovingi okudha komautilo ouye. Iya napano we ya vala otjikando tjimo pomaandelo omaluvedhe ouye, we liyamba omwene, a ithe po odhonkali.

²⁷Ovantu avehe va tuwa po ae lukulu okutya mava t̯i tumo, okudha mpoka mava ka kevelela ekoyo.

²⁸Iya naKristus wo wa yambwa otjikando tjimo, opo a ithe po odhonkali dhovengi. Iya me ke ya otjikando otjityavali, hakuya okwiitha po odhonkali, iya ma ka etela ehupitho mboka mbave mu kevelela.