Read zemba Jakob 2 Bible Online

Jakob 2 - zemba bible

Jakob 2

¹Vakwetu, himu na eitavelo muMuhona wetu Jesus Kristus, Muhona wetumbalo, hámu kala nokapungulula.

²Mosinagoga yen̯i andaa mwe ya omuyenda ngwaa dhala onela yotjingoldo nomidhalo vyouhona, mo hamu ya wo omuthona ngwaa dhala omidhalo mbyaa tandauka,

³mu tala ngwaa dhala omidhalo vyouhona, hamu tyaa: “Kala pohi hempa popawa,” iya omuthona mu mu heela hamu tyaa: “Ove kulama hoka ne kala pohi hempa pondambo podhompadhi dhandje.”

⁴Amamu lipungaulula nyahoka, kaamu undapa ovipuka ovivi?

⁵Vakwetu ovahivilikwa, teelelen̯i! Kalunga ka holowolele nan̯i mbava talwa mouye okutya ovathona, va ile ovahona meitavelo nodhompinga dhotjilongo tjaKalunga hitja udhikilwa mboka mbave mu hole?

⁶Iya n̯e mwa tomba ovathona. Mbave mu tatetha nambave mu twala movipopya nan̯i havahona?

⁷Ovahona hawo va penya ena ndyoka ewa mumwa lukilwa?

⁸Mamu ningi nawa, andaa mamu hwithile po oveta yopauhamba mOmisonekwa ndjimai tyaa: “Kala au hole omukwen̯i ngahi u lihole ove omwene.”

⁹Iya andaa mamu ningi okapungulula, mamu lundha, noveta mai mu pengele, n̯e ovayoni woveta.

¹⁰Iya nguma kambulitha oveta aihe, atjaa ha yono otjitumino tjimo okutya wa yono ovitumino avihe.

¹¹Iya ngwaa popya ha tyaa: “Hó yono olukupo,” oye a popya wo okutyaa: “Hó dhipaa.” Iya ove nandaku tiwa ku yonene olukupo, atjaa ove ho dhipaa, wa ile omuyoni woveta.

¹²Popyen̯i ne mu undape ngovantu mbamava ka koywa koveta ndjimai ve kutulula.

¹³Mbahave na onkenda novakwawo kaava ka t̯ilwa onkenda, iya mbave na onkenda mava ka ton̯a ekoyo.

¹⁴Vakwetu, tji na ouwa watji, amo tya u na eitavelo, ove himo undapa ahamatji yulike okutya u na eitavelo? Eitavelo ndii li nyahoka mali ku hupitha?

¹⁵Andaa omukwen̯i u li nyahinya ne ke na tja ovikulya,

¹⁶atjaa umo owomun̯e he mu heele ha tyaa: “Enda po nawa, dhala omidhalo omiwa, lya ovikulya oviwa,” matji popile tji, andaa n̯e kaamu mu pa soka hima hepa.

¹⁷Iya eitavelo ndii li nyahoka kali na tja ovilinga, lya t̯a.

¹⁸Pamo pe na nguma tyaa: “Matji tjiiwa okukala neitavelo ndihali na tja ovilinga.” Ame me mu yaka ame tyaa: “Ndjulikila ndje eitavelo ndihali na tja ovilinga, ame me mu yulikile eitavelo lyandje movilinga vyandje.”

¹⁹Ove wa itavela okutya Kalunga yuumo, iinga wa ninga nawa, iya nodhondemoni dhe tji itavela, dhi teketa.

²⁰Muvahima vanavi! Mamu hala okuyulikilwa okutya eitavelo ndihali na tja ovilinga lya t̯a?

²¹Tateombwale Abraham wa ningwa omuvyuuki kovilinga hiaa yamba omuna Isak kotjiyambelo.

²²U lwete atjaa eitavelo hilya undapa pamo novilinga vye, neitavelo hilya hwithilwa po kovilinga?

²³Omusonekwa wa hwithilwa po mbumau tyaa: “Abraham wa itavela muKalunga, Kalunga we mu tala okutya omuvyuuki.” Iya okutya wa li aa tiwa epanga lyaKalunga.

²⁴Mu lwete okutya omuntu ma ulu okuningwa omuvyuuki kovilinga, hakeitavelo vala aliika.

²⁵Hátjo ngahi tja ningwa wo kekunga ndinya Rahab, ngwaa ningilwe omuvyuuki kotjipala tjaKalunga, mena lyovilinga vye? Rahab wa yandja omala kodhontumwa dhOvaisraeli, he ve yulikile ondjila imo.

²⁶Iya olutu ahalu na tja omwenyo, lwa t̯a, iya neitavelo wo ahali na tja ovilinga, lya t̯a.