Read zemba Jakob 3 Bible Online

Jakob 3 - zemba bible

Jakob 3

¹Vakwetu, ovengi hámu ile ovalongethi, mu tji i okutya nt̯e ovalongethi matu ka koywa unene okupon̯a ovakwetu.

²Iya nt̯e atuhe tu lundha unene. Andaa pe na nguha lundha ama popi, omuntu ngoka u li nawa unene, ma ulu okutumina olutu lwe aluhe.

³Atwa twaa ovitomu movinyo vyodhonkambe, tu dhi endetha, hatu dhi vyuukitha akuhe humatu hala.

⁴Talen̯i odhombapolo ndhii li wo odhonene, ndhii yundulwa kombepo onene. Omusungi u vyuukitha ombapolo huma hala notjisungitho otjinunu.

⁵Elaka nalyo wo okan̯ipo okanunu, atjaa li litangela ovipuka ovinene. Taa tuutuu, ontepantepa i hika okuti.

⁶Elaka omulilo, li li ngouye mbwaa lundhaka. Elaka movin̯ipo vyetu li silika olutu aluhe, hali twaa onkalamwenyo yomuntu momulilo mbwaa tema, mbuu dha moheli.

⁷Omuntu ma ulu okulonga, u longa ovipuka mbii na omwenyo avihe ngahi tji li: Ovithitu, ovidhila, oviyaladhi novipuka vyomomeva,

⁸atjaa elaka kape na omuntu noumo nguma ulu oku li dheula. Elaka ouvi mbuhau tjiiwa okudheulwa, mbwee yula oudhioo, mbuu eta et̯o.

⁹Elaka olyo tu hivilika nalyo Muhona Tate, atjaa olyo tu penya nalyo ovantu mbava utwa otjithika tjaKalunga.

¹⁰Vakwetu, katja thele okukala nyahoka, motjinyo mumamu dhi odhondaka dhelao, hamu dhi uke odhondaka dhomathingo.

¹¹Othimo mai ulu tuu okupupa mondjila yayo imo mu dhe omeva omawa nomeva ngaa lula?

¹²Vakwetu, omukuyu mau ulu okuma odhoholivi ne omuve mau ulu okuma omakuyu? Othimo yomeva ngaa lula kaai ulu okweeta omeva omawa.

¹³Aan̯i mokati ken̯i nguu na odhondunge nounongo? Nge tji yulike nonkalo ye ombwa novilinga vye oviwa vyounongo mbyaa tutuvala.

¹⁴Iya andaa mu na onki nolwiho momitima vyen̯i, hámu litanga, n̯e hámu kembe okukondjetha otjatjili.

¹⁵Ounongo mbuu li nyahoka kau dhi kombanda, iya owouye, wountu nowoundiapoli.

¹⁶Mpape na onki nokulihole ovene, pa kala okungwangwana novilinga avihe ovivi.

¹⁷Ounongo mbuu dha kombanda, olutenga wa kohoka, u na ouwa, u na olukeno noupanga, we yula onkenda novilinga oviwa, kau na tja omalimbililo ne ovineya.

¹⁸Omuntu nguu eta ouwa, aa kunu ombuto youwa, ma ka teya ouvyuuki.