Read zemba Jakob 5 Bible Online

Jakob 5 - zemba bible

Jakob 5

¹Iya napano ovahona teelelen̯i, lilen̯i n̯e mu yayane mena lyomaudheu ngamae ke mu vadha.

²Ouhona wen̯i wa wola, omidhalo vyen̯i vya liwa kotundu.

³Otjisilveri notjingoldo tjen̯i tja ninga omulelu, hehi matji ningi oumbangi woku mu pa ombedhi. Omulelu hembu mau ka lya onyama yen̯i ngomulilo. Mwe liongedhela omauhona pomatango henga opehulilo.

⁴Taa tuutuu, ondjambi yovaundapi wovyana vyen̯i ndjimwe ve kengelela, mai kuu onkwoo. Okuyaya kwovantu mboka mbava teya ovilya vyen̯i, kwe thika momatwi aMuhona Sebaot.

⁵Mwa kala mouwa kombanda yohi nomomahalo en̯i. Mu n̯initha omitima vyen̯i metango ndyoka ape na ngwaa twele.

⁶Mwa koya, hamu dhipaa omuvyuuki, ye ke mu kondjethele

⁷Iya vakwetu, likambulithilen̯i katee Muhona ma tjuna. Taa tuutuu, omunatjana u kevelela katee oviliwa vyolutenga motjana mavi utu okuliwa, he likambulithile uke okudha kombula amai uula katee kompumamuhoke mai utu okuula.

⁸Nan̯e wo likambulithilen̯i, omitima vyen̯i ngavi dhike, mena lyokutya okutjuna kwaMuhona ku li popedhi.

⁹Vakwetu, hámu litangunitha, opo hámu koywa. Taa tuutuu, nguma koyo wa kulama pomuvelo.

¹⁰Vakwetu, holelen̯i ovaprofeti mbava popya mena lyaMuhona, mbave likambulithila momaudheu.

¹¹Taa tuutuu, mbave likambulithila, matu tya ovanalao. Job hiee likambulithila, mwe mu tyaa. Mwa mona omaandelo ngaa pewa kuMuhona, mena lyokutya Muhona u na olukeno nomutima wonkenda.

¹²Iya vakwetu, komeho yovipuka avihe, hámu ana eulu ne ohi n̯e hámu ana eano nolimo. Iya tyen̯i vala “Iinga, iinga” ne “Aai, aai”, opo hámu koywa.

¹³Mokati ken̯i andaa pe na nguu na oudheu, nga kumbe, andaa pe na ngwee hulukwa, nga imbe oviimbo okuhivilika.

¹⁴Mokati ken̯i andaa pe na nguma vele, nga ithane ovanene veongalo, ve mu kumbile, wo ve mu tohole omadhi mena lyaMuhona.

¹⁵Ealikano lyomwiitaveli mali velula omuvedhi. Muhona me mu imuna. Andaa wa lundha, Muhona me mu ithile po odhonkali.

¹⁶Iya lihipululilen̯i odhonkali dhen̯i, mu likumbile, opo mu veluke. Ealikano lyomuvyuuki li na odhonkono odhonene, mali ulu okuninga tja.

¹⁷Elia wa li omuntu ngant̯e. Wa kumba okutya ombula ahamai loko, yo ahamai loko oule wodhombula ndatu nomiedhi epandu.

¹⁸Iya wa kumba uke, ombula hai loko, ohi hai mene ovilya.

¹⁹Vakwetu, andaa mokati ken̯i mu na nguma dhi mondjila yatjatjili, umo he mu tjun̯a,

²⁰koneka okutya nguma tjun̯a omulundhi, he mu pukulula mondjila ye yepuko, ma hupitha omwenyo womulundhi ngoka met̯o, nodhonkali dhe adhihe madhi ithwa po.