Read zemba 1 Petrus 2 Bible Online

1 Petrus 2 - zemba bible

1 Petrus 2

¹Iya yethen̯i ovipuka avihe ovivi, ovithithi, okulinoma, onki nomalwaambo.

²Ngoupepe hiuu yama omahini, nan̯e kalen̯i nonyota yomahini opambepo ngoka ngae li odhondaka dhaKalunga, e mu kulithe, mu hupithwe.

³Omusonekwa ngahi mau popi himau tyaa: “N̯e mwa koneka okutya Muhona omuwa.”

⁴Indjen̯i kuMuhona, kewe enamwenyo ndyaa yekelwahi kovantu. Kalunga we li holowola, li na otjilinga otjinene.

⁵Ngomawe omanamwenyo, tungithwen̯i onganda yopambepo, mu ile ovayambethi ovadhilikwa wokuyamba omayambo opambepo ngamaa tambulwa kuKalunga okupitila muJesus Kristus.

⁶Iya Omusonekwa mau tyaa: “Taa tuutuu, ame me twaa moSion ewe ndyaa holowolwa, ndii na otjilinga otjinene. Nguma itavele muye, kaa ka t̯ithwa ohon̯i.”

⁷Ewe hendi kun̯e mbamwa itavela, li na otjilinga otjinene. Iya kumbahava itavelele, Omusonekwa mau tyaa: “Ewe ndyoka ovatungi ndiva yekelahi, lya ninga ewe ndyaa tumbala okupon̯a omawe aehe.”

⁸Omusonekwa omukwawo mau tyaa: “Ewe lyokuputaletha ovantu, noluwaa lyoku ve withitha.” Mava putala, mena lyokutya kava itavelele ondaka yaKalunga, ngahi va li amava halelwa.

⁹Iya n̯e mumuhoko mbwaa holowolwa, ovayambethi wombala, otjiwan̯a otjidhilikwa, ovantu vaKalunga omwene mbamwa holowolwa, mu hipulule ovilinga vye ovinene. Kalunga we mu ithana mo met̯iku, mu ye motjiten̯i tje otjikumithi.

¹⁰Nahi lukulu kamwa li ovantu vaKalunga, iya napano mwa ninga ovantu ve. Nahi lukulu kamwa li amu i et̯ilonkenda lyaKalunga, iya napano et̯ilonkenda lye mu li i.

¹¹Vahivilikwa, me mu pukulula, mu li ngovayenda nodhongendi mouye hembu. Litjaelen̯i komahalo aehe ountu ngaa kondjetha omwenyo.

¹²Kalen̯i nonkalo ombwa mokati kovapaani, iya andaa mave mu kuminine okutya mu undapa ouvi, va koneke ovilinga vyen̯i oviwa, va hive Kalunga katango me ya.

¹³Mena lyaMuhona tyeen̯i ketumino alihe lyountu, kutya nee okohamba nguu li omutumini wovantu avehe,

¹⁴ne kovatumini mbava tumwa komutumini wotjilongo okuya okuyumaneka mbava undapa ouvi nokupandula mbava undapa ouwa.

¹⁵Iya Kalunga ma hala okutya ovipuka mbimu undapa oviwa, vi tutuvaleke omapopyo omawoova.

¹⁶Kalen̯i amwa kutuluka, ekutuluko lyen̯i hámu li undapetha okutjikila ouvi wen̯i, iya kalen̯i ngovapika vaKalunga.

¹⁷Tumbaleken̯i ovantu avehe. Kalen̯i amu hole ovaitaveli vakwen̯i. Tilen̯i Kalunga, n̯e mu tumbaleke omutumini.

¹⁸Vaundapi, tyeen̯i kovahona ven̯i, n̯e mu ve tumbaleke. Hámu tee vala kumbave li nawa, iya nokumbave na onya.

¹⁹Kalunga me ke mu pa otjiwa, andaa mamu likambulithile omatatetho, n̯e ahamu na himwa ningi, mena lyelityoo lyen̯i kotjipala tjaKalunga.

²⁰Matji popile tji, andaa mamu likambulithile, nan̯i n̯e amwa tonenwa okuundapa ouvi? Iya andaa mamu likambulithile omatatetho, amamu undapa ouwa, okutya Kalunga me ke mu pa otjiwa.

²¹Iya otjipuka hitji li hinyahi, Kalunga otjo e mu ithanena, mena lyokutya Kristus naye wo wa tatethwa mena lyen̯i, we mu thiila otjiholelwa, opo mu landule modhompadhi dhe.

²²Ye ka lundhile nokanunu. Kape na tja omuntu noumo ngwee mu tyaa ama popi ovithithi,

²³mbave mu penya, ke ve penyene, hiaa tatethwa, ka yumanene. We liun̯ika muKalunga ke nguu koya nawa hitja vyuuka.

²⁴Kristus wa tjinda odhonkali dhetu molutu lwe komutjaakano, opo tu kutuluke koulundhi, tu kale amatu undapa hitja vyuuka. N̯e mwa velulwa koviwalo vye.

²⁵Iya n̯e mu ngala odhondhu ndhaa keka, iya napano mwa tjuna komut̯ita nomutekuli womienyo vyen̯i.