Read zemba 1 Petrus 4 Bible Online

1 Petrus 4 - zemba bible

1 Petrus 4

¹Iya Kristus ngahiaa ihamekwa kolutu, nan̯e wo otjo mwa thele okulivandhipaleka ovene, mu lipule ngaye hiee lipulile. Iya nguma tatethwa kolutu ma yetha ouvi.

²Iya okudha ndino hendi okukala kwen̯i kombanda yohi ngaku kale mehalo lyaKalunga, hámu kala mehalo lyen̯i.

³Tjau, tja hula, himwa kala amu undapa hitji undapa ovapaani. Mwa li monkalo yokuhelitjaela movihulo, olwiho, epyalu, odhontjingo dhomaut̯iku, omahalo ovikunwa, nomovipuka ovivi vyokuundapela ovikalunga.

⁴Ovapaani ve kumwa, mena lyokutya kamu undapa uke pamo nawo monkalo yokuhelitjaela kutja, opo va dha oku mu penya.

⁵Wo va thele oku ke lihipulula kotjipala tjaKalunga, ngwee lilongekedha okukoya ovat̯e nambave na omwenyo.

⁶Iya ondaka ombwa ya teethelwa wo ovat̯e, opo nandaku tiwa va koywa mountu ngovantu avehe hiva koywa, va kale nomwenyo wopambepo ngaKalunga hiee na omwenyo.

⁷Ehulilo lyovipuka avihe li li popedhi. Lungamen̯i, mu liyunge nawa, opo mu tjiiwe okukumba.

⁸Komeho yovipuka avihe, kalen̯i amu lihole. Ohole i t̯imika omauvi omengi.

⁹Yakulen̯i ovayenda modhonganda dhen̯i, hámu ngongota.

¹⁰Omuntu auhe nga undapethe otjali soka hiaa pewa kuKalunga okupopila natjo ovakwawo ngahi matji thevelwa ovayungi ovawa wokuyunga otjali tjaKalunga hitji lili nahitji lili.

¹¹Nguma teetha, wa thele okuteetha ondaka oyeneyene ndjaa dhi kuKalunga. Nguma popile, nga popile nodhonkono ndhima pewa kuKalunga, opo Kalunga a tumbalekwe movipuka avihe okupitila muJesus Kristus. Kalunga wa tumbala, u na odhonkono apehe katee apehe. Amen.

¹²Vahivilikwa vandje, hámu kuminwa omaudheu mumu li napano, ngotjipuka hihamuya mona nkee mwa dhile.

¹³Iya hulukwen̯i, himu na mo tja momatatetho aKristus, opo mu hulukwe n̯e mu lolole, katango wo etumbalo lye mali ka holololwa.

¹⁴Amamu lalulwa mena lyokutya mwa itavela muKristus okutya muvanalao, mena lyokutya Ombepo yelaimo, Ombepo yaKalunga i li kombanda yen̯i.

¹⁵Mun̯e hámu kala omuntu nguma tatethwa mena lyokutya u dhipaa ne otjimpulu ne omputji ne u na olumbwe novipuka vyovantu.

¹⁶Iya amamu tatethwa mena lyokutya muvakriste, hámu t̯a ohon̯i, tumbaleken̯i Kalunga, mena lyokutya ovantu ve mu tya muvakriste.

¹⁷Oluvedhe lwokukoywa lwe thiki, ovantu vaKalunga nt̯e, ont̯e matu koywa olutenga. Andaa ont̯e matu utu okukoywa, omaandelo atjo maa ka kala vi kovantu mboka mbahava itavelele ondaka ombwa ndjaa dha kuKalunga?

¹⁸Omusonekwa ngahi mau tyaa: “Andaa omuvyuuki ma hupithwa noudheu, nguhe na ko natja naKalunga ma ningwa vi?”

¹⁹Iya mbamava tatethwa mena lyehalo lyaKalunga, ngava undape ouwa, ve liyandje mOmuuti wawo omuliun̯ikwa.