Read zemba 1 Petrus 5 Bible Online

1 Petrus 5 - zemba bible

1 Petrus 5

¹Ovanene veongalo mbave li mokati ken̯i me ve pukulula, ame ngundji li omunene weongalo nombangi yaKristus hiaa tatethwa. Metumbalo ndyoka ndimali ka holololwa, naame wo me ka pewa mo.

²Lithen̯i odhondhu Kalunga ndhee mu pa. Dhi lithen̯i nawa, Kalunga ngahi ma hala, hakun̯in̯ikidhwa. Hámu undapele vala othuto, iya undapen̯i nehalo ewa.

³Ovantu mbamwa pewa, hámu ve tumine ngovatumini, iya kalen̯i otjiholelwa tjawo.

⁴Omut̯ita omunene hime ya, mamu ka pewa ohala yetumbalo ndjihamai kundjuka.

⁵Nan̯e omitanda tyeen̯i kovanene. Amuhe linunupiken̯i, opo mu tjiiwe okulipopila. Omusonekwa mau tyaa: “Kalunga u yele ovalinomi, u t̯ila onkenda ovalinunupiki.”

⁶Iya linunupiken̯i kohi yokuwoko kwodhonkono dhaKalunga, Kalunga opo e mu nenepeka poluvedhe oluwa.

⁷Mu pen̯i otjiho tjen̯i, mena lyokutya oye me mu t̯ile otjiho.

⁸Liyungen̯i, mu pathumuke. Ondjedhi yen̯i, omudiapoli, u mu kondoloka otjo ma popi ngonkeyama amai hala okukambula himai hala okulya.

⁹Iya mu kondjethen̯i neitavelo ndyaa kola. Iya iwen̯i okutya ovakwen̯i mouye nawo va tjinda omaudheu ngahenga.

¹⁰Iya napano Kalunga nguu na onkenda aihe, ngwee mu ithanena metumbalo lye ndihamali anda, muKristus Jesus, himwa kala kohi youdheu okaluvedhe okanunu, ye omwene me mu longekedha, he mu pa odhonkono, hamu pama, hamu kala amwa kolo.

¹¹Kalunga nga tumine apehe katee apehe. Amen.

¹²Silas, omukwetu ngumbe liun̯ika, wa mpopila okuntjonekela ko omukanda hembu pauthupi. Me hala oku mu vandhipaleka, ndji mu hipululile okutya hehi et̯ilonkenda lyaKalunga lyatjatjili. Kalen̯i amwa kola.

¹³Eongalo ekwen̯i lyomoBabilon ndimwa holowolwa pamo nalyo, mali mu menekele po. Omunwandje Markus naye me mu menekele po.

¹⁴Limenekelen̯i po, mu kale amu lihole, mu lihupite nohole youkriste. Ouwa ngau kale nan̯e amuhe mbamu li ovaKristus. Amen.