Read zemba 2 Petrus 1 Bible Online

2 Petrus 1 - zemba bible

2 Petrus 1

¹Omukanda hembu mau dhi kwaame Simon Petrus, omupika nomuyapostoli waJesus Kristus. Me sonekele mboka mbava pewa eitavelo ewa ngolyetu mena lyouvyuuki waKalunga ketu nowOmuhupithi Jesus Kristus.

²Et̯ilonkenda nouwa owingi ngau kale nan̯e, mena lyokutya mu i Kalunga naJesus Muhona wetu.

³Odhonkono dhe dhopaukalunga dhe tu pa ovipuka avihe mbitu hepa, opo tu kale nomwenyo nontilokalunga. Hehi matji tjiiwa, mena lyokutya nt̯e napano Kalunga tu mu i. Oye e tu ithana netumbalo nouwa we.

⁴Iya mena lyovipuka hembi, we tu pa otjali omaudhiko omanene ngae na okalu. Amwe e tambula mamu ulu okwiinkola elundhako ndii li mouye hembu mena lyehalo evi, hamu pewa mo monkalo yopaukalunga.

⁵Iya mena lyokutya Kalunga we tu undapela wo ovipuka ovinene hembi avihe, kondjen̯i nodhonkono adhihe, eitavelo lyen̯i li yulike ouwa, ouwa u yulike odhondunge,

⁶odhondunge dhi yulike okuliyunga nokulikambulithila, okulikambulithila ku yulike ontilokalunga,

⁷ontilokalunga i yulike ohole okukala au hole ovakriste ovakwen̯i, okukala au hole ovakriste ovakwen̯i ku yulike okukala au hole ovantu avehe.

⁸Ovipuka hembi andaa mu na vyo, havi ile ovingi mun̯e, mavi mu itha ondende, havi mu twala movilinga mbyoka mbimavi eta ovinyango okwiiwa kwen̯i Muhona wetu Jesus Kristus.

⁹Iya nguhe na tja ovipuka hembi, omupot̯i, ke ku mono, wa dhimba okutya odhonkali dhe dhalukulu dha ithwa po.

¹⁰Vakwetu, kondjen̯i unene, koleken̯i eitavelo neholowolo lyen̯i himwa ithanwa kuKalunga, mena lyokutya andaa otjo mamu ningi nyahoka, kaamu putala nokanunu.

¹¹Iya nyahoka mamu ka pewa oluvedhe oluwa ndwaa hulu okuya motjilongo tjaapehe tjaMuhona wetu, Omuhupithi, Jesus Kristus.

¹²Iya me kala ame mu thipalukitha ovipuka hembi apehe, nandaku tiwa n̯e ovene mu vi i, nahimwa pamekelwa motjatjili himu na tjo.

¹³Ame me lipula okutya tja vyuuka ndji mu thipalukithe ovipuka hembi, tainkolo ndji na omwenyo.

¹⁴Iya ame ndji tji i okutya et̯o lyandje li li popedhi, ngahi mba heelwa kuMuhona wetu Jesus Kristus.

¹⁵Me kondjo oku mu yulikila ondjila, opo katango me dhi po mu tjiiwe wo apehe okuthipaluka ovipuka hembi.

¹⁶Hitwe mu heela odhonkono nokutjuna kwaMuhona wetu Jesus Kristus, katu popile odhongano ndhii tewa kovantu. Iya nt̯e twa mona nomeho etu ovene odhonkono dhe odhonene.

¹⁷Kalunga Ihe we mu pa etumbalo nelaimo. Ondaka yetumbalo lyokombandambanda ye ya kuye, hai tyaa: “Hengu oye e li omunwandje omuhivilikwa ngumba hopa.”

¹⁸Ondaka hendji ndjaa dha meulu, nt̯e ovene twe i tyaa, hitwa li naye kondundu ondhilikwa.

¹⁹Nt̯e tu na etumwalaka lyouprofeti ndyaa kola unene. Mamu ningi nawa amamu litwaa mo nawa, mena lyokutya lyo li ngala olamba amai tungatele met̯iku, katee maku tji, ngonyothi yomomahuka amai tungatele momitima vyen̯i.

²⁰Komeho yovipuka avihe, kalen̯i amu tji i okutya kape na tja omuntu nguma ulu okuthitulula nodhondunge dhe ouprofeti waKalunga mbuu li mOmisonekwa,

²¹mena lyokutya kaku na tja ouprofeti mbwaa etwa kehalo lyomuntu, iya ovantu va popya soka hiva pewa kuKalunga, hava viyulwa kOmbepo Ondhilikwa.