Read zemba 1 Johannes 1 Bible Online

1 Johannes 1 - zemba bible

1 Johannes 1

¹Nt̯e matu mu heele Ondaka yomwenyo ndjaa li ko okudha peutilo. Twe i tyaa, nt̯e twe i mona nomeho etu, twe i tala, nomawoko etu e i t̯in̯a.

²Omwenyo hembu wa holololwa, nant̯e twe u mona. Matu yandja oumbangi wahitwa mona, hatu mu heele omwenyo waapehe mbwaa li puTate, mbutwa holololelwa.

³Matu mu heele wo hitwa mona nahitwa tyaa, opo nan̯e wo mu kale noukumo nant̯e. Iya tu na oukumo naTate nOmuna Jesus Kristus.

⁴Matu mu sonekele ovipuka hembi, opo ehuluko lyetu li hwithilwe po.

⁵Matu mu heele elaka hendi nditwa tyaa muye okutya Kalunga oye e li otjiten̯i, muye kamu na tja et̯iku nokoholo.

⁶Andaa matu tya tu na oukumo naye, nt̯e amatu ende met̯iku okutya matu kembe, kaatu undapa otjatjili.

⁷Iya andaa matu ende motjiten̯i ngaye hiee li motjiten̯i, pokati ketu pe na oukumo, nombindhi yaJesus, Omuna, mai tu koho kodhonkali adhihe!

⁸Andaa matu tya katu na tja odhonkali, matu likembele po ovene, notjatjili katji mo munt̯e.

⁹Andaa matu hipulula odhonkali dhetu, Kalunga omuvyuuki nomuliun̯ikwa, okutya me tu ithile po odhonkali, ye me tu koho kokuhavyuuka kwetu.

¹⁰Andaa matu tya katu lundha, okutya matu mu ningi onkembi, nodhondaka dhe kadhi mo munt̯e.