Read zemba 1 Johannes 4 Bible Online

1 Johannes 4 - zemba bible

1 Johannes 4

¹Vahivilikwa, hámu itavele ombepo aihe, iya thongononen̯i odhombepo andaa dha dha kuKalunga, mena lyokutya ovaprofeti ovengi wovithithi va handjana nouye.

²Iya nyahoka Ombepo yaKalunga tu i i. Ombepo aihe ndjimai hipulula okutya Jesus Kristus wa ninga omuntu, okutya ombepo ndjoka ya dha muKalunga.

³Ombepo aihe ndjihamai hipulula Jesus Kristus, kai dhile muKalunga, iya ombepo ndjoka oyaAntikristus ngumwa tyaa okutya me ya, iya napano we ya ae mouye.

⁴Vanwandje, n̯e muvaKalunga, mwa ton̯a ovaprofeti wovithithi, mena lyokutya ngwaa kala mun̯e omunene okupon̯a hengu nguu kala mouye.

⁵Wo owomouye, iya mena lyokutya wo owomouye, va popya pauye, nouye hau ve tee.

⁶Nt̯e tuvaKalunga, nguu i Kalunga, me tu tee, nguhe i Kalunga, kee tu tee. Iya nyahoka matu iwa ombepo yatjatjili nombepo yovithithi.

⁷Vahivilikwa, ngatu kale atu lihole, mena lyokutya ohole ya dha muKalunga. Iya auhe nguu na ohole, wa yumukwa muKalunga, ye ma iwa Kalunga.

⁸Nguhe na tja ohole, ke i Kalunga, mena lyokutya Kalunga ohole.

⁹Iya nyahoka ohole yaKalunga ya holololwa mokati ketu, mena lyokutya Kalunga wa tuma Omuna Ongunga mouye, opo tu kale nomwenyo muye.

¹⁰Iya mpoka opo pe na ohole, hamena lyokutya nt̯e twa kala atu hole Kalunga, iya oye a kala ae tu hole, ha tumu Omuna a ninge ondjowo yodhonkali dhetu.

¹¹Vahivilikwa, Kalunga hiaa kala ae tu hole nyahi, iya nant̯e wo twa thele okukala atu lihole.

¹²Kape na tja noumo ngwaa mona Kalunga, nandaku tiwa etango limo. Andaa matu kala atu lihole, okutya Kalunga ma kala munt̯e, nohole ye mai yula munt̯e.

¹³Iya nyahoka tu tji i okutya matu kala muye, ye ma kala munt̯e, mena lyokutya we tu pa Ombepo ye.

¹⁴Nt̯e twe tji mona, matu tji hipulula okutya Ihe wa tuma Omuna a kale Omuhupithi wouye.

¹⁵Nguma hipulula okutya Jesus OmunwaKalunga, Kalunga ma kala muye, naye ma kala muKalunga.

¹⁶Nt̯e tu i i, ye twa itavela ohole hendji Kalunga ndjee na yo, hiee tu hole. Kalunga ohole, nguma kala mohole, ma kala muKalunga, Kalunga ma kala muye.

¹⁷Iya nyahoka ohole ye yula munt̯e, opo tu kale neliun̯iko metango lyekoyo, mena lyokutya ngaye hiee li, nant̯e wo otjo tu li mouye hembu.

¹⁸Mohole kamu na tja owoma, mena lyokutya ohole ndjee yula, i itha po owoma, mena lyokutya owoma u na tja noluyuma, ngwaa lya owoma, ke na tja ohole ndjee yula.

¹⁹Nt̯e tu mu hole, mena lyokutya olutenga oye a kala ae tu hole.

²⁰Andaa pe na nguma tya u hole Kalunga, atjaa ye ae yele omukwawo, iya onkembi. Iya nguhe hole omukwawo ngwee lwete, kaa ulu okukala ae hole Kalunga nguhe lwete.

²¹Otjitumino hehi hitu na tjo, tja dha kuKalunga. Nguu hole Kalunga, nga kale ae hole wo omukwawo.