Read zemba 2 Johannes 1 Bible Online

2 Johannes 1 - zemba bible

2 Johannes 1

¹Aame omuviyuli omunene, me sonekele omukadhintu omuholowolwa nodhondele dhe, mbandji hole tjatjili, haame vala aika, iya namboka wo avehe mbave i otjatjili,

²mena lyotjatjili himatji kala munt̯e, tjo matji kala pamo nant̯e katee apehe.

³Et̯ilonkenda nolweembya nouwa waKalunga Tate nowaJesus Kristus, Omuna waIhe, mau kala pamo nant̯e motjatjili nomohole.

⁴Ame mbe hulukwa unene, himba mono vamo owomodhondele dhoye, hiva enda motjatjili ngotjitumino himatji popi, soka hitwa pewa kuTate.

⁵Iya napano ame me ku kumbu, ove omukadhintu omuholowolwa, híme ku sonekele otjitumino otjipe, iya hootjohi hitu kala natjo okudha peutilo okutya ngatu kale atu lihole.

⁶Iya ohole hooyondji okutya tu ende monkalo yovitumino vye. Hehi otjo tji li otjitumino ngahi mwe tji tyaa okudha peutilo, iya n̯e mwa thele okweenda mutjo.

⁷Ovapukithi ovengi va handjana nouye, ovantu mboka kava hipulula okutya Jesus Kristus we ya molutu. Omuntu nguu li nyahoka oye e li omupukithi omunene, ye oye e li Antikristus.

⁸Iya lilungamenen̯i ovene, opo hámu keketha soka hitwa undapa, iya mu mone ondjambi ndjaa hulu.

⁹Auhe nguma i pontyo, ahama kala melongo lyaKristus, okutya ke na tja Kalunga, nguma kala melongo lye, oye ma kala ae na Ihe nOmuna.

¹⁰Andaa pe na ngume ya kun̯e, ye ahama eta elongo hendi, hámu mu tambula monganda yen̯i, n̯e hámu mu popitha.

¹¹Iya ngume mu tambula, me litwaa movilinga ovivi vyomuntu ngoka.

¹²Ndji na otjingi oku mu sonekela, atjaa híme hala oku tji ninga momukanda nohinga, iya me liun̯ike okutya me ya kun̯e, tu popye otjinyo notjinyo, ehuluko lyetu opo li hwithilwe po.

¹³Odhondele dhompandjoye, omuholowolwa, mave ku menekele po.