Read zemba 3 Johannes 1 Bible Online

3 Johannes 1 - zemba bible

3 Johannes 1

¹Aame omuviyuli omunene, me sonekele Gaius omuhivilikwa ngundji hole tjatjili.

²Omuhivilikwa, ame me ku halele ouwa auhe movipuka avihe, ove u kale au li nawa ngomwenyo woye hiuu li nawa.

³Iya ame mbe hulukwa tjatjili, ovakwetu hive ya kwaame, va hipulula otjatjili tjoye, ngahi u enda motjatjili.

⁴Ame hí na tja ehuluko limo ndyaa pon̯a hendi, hindji yuvite odhondele dhandje hiva enda motjatjili.

⁵Gaius, omuhivilikwa, u ningila nawa ovaitaveli vakwen̯i, nodhongendi wo,

⁶mbava hipulula ohole yoye movipathi vyeongalo. Ove u ninga nawa hiuu ve popila mondjila yawo, ngahi matji thevelwa kotjipala tjaKalunga.

⁷Iya va ya nondjila mena lyena lyaKristus, háve na hiva itha kovapaani.

⁸Iya twa thele okutambula nawa ovantu mbave li nyahoka, opo tu ninge ovapopili vatjatjili pamo nawo.

⁹Ame mba sonekela tja keongalo, atjaa Diotrefes nguu liholele komeho movakwawo, ke tu tambulile.

¹⁰Iya ambe ya, me ke mu thipalukitha ovilinga vye mbyaa undapa, hiee tu kuminina odhondaka odhombi. Iya hehi katji mu hulile, ye ka popile ovaitaveli nambamava hala okupopila ovaitaveli, u ve tjaela, he ve lamba mo meongalo.

¹¹Muhivilikwa, hó holele ouvi, iya holela ouwa. Nguu undapa ouwa, oye e li owaKalunga, nguu undapa ouvi, Kalunga ke mu i.

¹²Ovantu avehe va hipulula nawa Demetrius, otjatjili tjo otjene tje mu popya nawa, nant̯e wo matu mu hipulula nawa, ove u tji i okutya otjihipululo tjetu otjatjili.

¹³Ndji na otjingi oku ku sonekela, atjaa híme hala oku tji ninga nohinga nopena.

¹⁴Iya me liun̯ike okutya me ku mono dhiva tu ka popye otjinyo notjinyo.

¹⁵Ouwa ngau kale naove. Omapanga etu mae ku menekele po. Menekela po omapanga etu, ove u menekele po avehe.