Read zemba Judas 1 Bible Online

Judas 1 - zemba bible

Judas 1

¹Omukanda hembu mau dhi kwaame Judas, omupika waJesus Kristus, omunitjaJakob. Me sonekele n̯e amuhe mbamwa ithanwa, mbamu holwe kuIhe Kalunga, mbamwa amenwa kuJesus Kristus.

²Olweembya nouwa nohole yaKalunga on̯ingi ngai kale nan̯e.

³Vaitaveli vakwetu ovahivilikwa, ame mba li ame hala unene oku mu sonekela mena lyehupitho lyomienyo vyetu atuhe. Ame mba li andji yuvite okutya mba thele oku mu sonekela ndji mu pukulule, n̯e mu kondjele eitavelo hendi ndyaa pewa ovantu ovadhilikwa motjikando tjimo.

⁴Iya ku na ovantu vamo mbave liyombela mokati ken̯i, va sonekelwa lukulu ekoyo. Ovantu hemba kave na ko natja naKalunga, et̯ilonkenda lyaKalunga ketu ve li pidhidhika novilinga vyawo vyokuhelitjaela movihulo. Wo ve litendela Jesus Kristus, Muhona wetu, elombe aika.

⁵Nandaku tiwa ovipuka hembi avihe mu vi i, me hala oku mu thipalukitha okutya Muhona ngwaa hupitha ovantu okudha moEgipiti, kon̯ima wa ka han̯auna po mboka mbahave mu itavelele.

⁶Ovaengeli mboka mbahava kambulithile oulombe wawo, hava thii po omalukalo awo, Muhona we ve yedhilila met̯iku, modhonkuto dhaapehe, va takamethwe katee ketango ndyoka enene lyekoyo.

⁷NgaSodom naGomorra novitungwalongo mbyaa li onkondoloka navyo, ovantu mboka va li movihulo ngovaengeli hembenya, va puka, hava landula omahalo omalutu awo, modhonkalo ndhihadhi thi dhountu. Iya va yumanekwa nomulilo waapehe, tji kale elondolo kovantu avehe.

⁸Iya ovantu hemba otjo ve li nyahoka, va lota odhondjodhi ndhii ve ningitha okutya tjikootjimo va silika omalutu awo, tjikootjimo va tomba etumino lyaKalunga, wo va penya mbave li metumbalo.

⁹Iya Mikael omweengeli omunene nandaku tiwa va li nombata naSatana mena lyotjivimbi tjaMoses okutya aan̯i nguma i natjo, ka popile Satana elaka evi ne e mu penye, iya we mu heela vala ha tyaa: “Muhona nge ku yumaneke.”

¹⁰Iya ovantu hemba va popya ovipuka ovivi okupenya ovipuka avihe mbihave i. Iya ovipuka mbive i vala mountjitwe ngovithitu, ovyo mavi ve teya po.

¹¹Utatyei ovantu mboka, mena lyokutya va ya nondjila yaKain. Ve litaendhele ondjambi ngaBileam, have liyandja mepuko lye. Ve lininga ovahaitaveli ngaKora, mava han̯aunwa po ngaye.

¹²Ovantu hemba povikulya vyen̯i vyoukumo va t̯itha ohon̯i, va ngala va tunda, ve litekula vala ovene, va ngala omakaka ngaa ithwa ko kombepo ngahae na tja ombula. Wo va ngala omiti vyopompepela mbihavi na ovinyango, mbyaa dhoolwa mo nomidhi vyavyo, havi t̯i.

¹³Wo va ngala omakuthikuthi elunga, ovilinga vyawo vyohon̯i vi ngala etutu amali tutuma. Wo va tenaunuka ngodhonyothi ndhaa ungulilwa et̯iku lyaapehe.

¹⁴Henok, omutyapanduvali okudha kuAdam, we ve thimbila ae lukulu ha tyaa: “Muhona me ya nomayovi omengi ovaengeli ve ovadhilikwa

¹⁵okukoya nokuyumaneka ovantu avehe mbahava tee Kalunga, mena lyovilinga vyawo ovivi mbiva undapa okuhatyaa Kalunga. Ovalundhi mbahave na ko na tja naKalunga, va popya ovipuka ovinene okukondjetha Muhona!”

¹⁶Ovantu hemba va kala amava tanguna nokupa ovakwawo odhombedhi. Va landula omahalo awo ovene. Wo ve linoma vala okutya ovantu opo va ama kuwo.

¹⁷Iya vahivilikwa, thipaluken̯i odhondaka ndhoka ndhaa popiwa kovayapostoli vaMuhona wetu Jesus Kristus,

¹⁸mena lyokutya wo ve mu heela hava tyaa: “Pomatango athiinina mape ke ya ovapenyi, mbava endethwa komahalo awo ovene, mbahave na ko natja naKalunga.”

¹⁹Ovantu mboka owo ve li mbava eta omaliyapauko, ve li monkalo yountu, kave li pambepo.

²⁰Iya n̯e ovahivilikwa, litungilen̯i kekulameno lyeitavelo lyen̯i edhilikwa. Kumben̯i mOmbepo Ondhilikwa.

²¹Likaleken̯i mohole yaKalunga, kevelelen̯i onkenda yaMuhona wetu Jesus Kristus, e mu pe omwenyo waapehe.

²²T̯ilen̯i onkenda mbava limbililwa,

²³ve hupithen̯i, mu ve kaule mo momulilo. Iya vamo ve t̯ilen̯i onkenda, mu tile, n̯e mu toye omidhalo vyawo vyokohi mbyaa silikwa kovihulo vyawo.

²⁴Iya napano Kalunga ma ulu oku mu amena, hápe na tja oudheu, he mu kaleke metumbalo lye kotjipala tje, hamu kala nehuluko, ahamu na ombedhi.

²⁵Kalunga aika Omuhupithi wetu, muJesus Kristus, Muhona wetu u na elaimo netumbalo nodhonkono netumino okudha kolukulu katee napano, katee apehe. Amen.