Read zemba Eholololo 10 Bible Online

Eholololo 10 - zemba bible

Eholololo 10

¹Iya mba mona omweengeli omukwawo nguu na odhonkono ngwaa dha meulu, aa dhalekwa ekaka, komutwe we wa dhalekwa outa wangonga, otjipala tje tja li amatji ngala etango, omakulu e a li amaa ngala odhongundhi dhomulilo.

²Omweengeli wa li nokadhingwambo mokuwoko kwe, aka dhingululwa. Ompadhi ye yokokulyo wa lyata melunga, noyokokumbinda wa lyata kombanda yohi.

³Wa wololoka unene ngonkeyama amai popi. Iya hiaa wololoka, omititimo vyombula epanduvali vya titima.

⁴Iya omititimo vyombula epanduvali hivya titima, ame mbe tje soneka. Iya mba tyaa ondaka ndjaa dha meulu hai tyaa: “Tji nyimina soka hitja popiwa komititimo vyombula epanduvali, hó tji soneke.”

⁵Omweengeli ngoka ngumba mwene aa kulama melunga nokombanda yohi, wa yela okuwoko kwe kwokokulyo peulu,

⁶ha ana hengu nguu na omwenyo apehe katee apehe, ngwaa uta eulu nohi nelunga novipuka avihe mbii li mo, okutya kaku na tja uke oluvedhe nokanunu.

⁷Iya pomatango ngoka omweengeli omutyapanduvali hima hiki onkwino, otjiholekwa tjaKalunga matji ka hwithilwa po, ngahi a heela ovantu ve ovaprofeti.

⁸Iya ondaka ndjaa dha meulu ndjimba teele amai mpopitha, ya ntjeela uke hai tyaa: “Enda, itha mo okadhingwambo haka dhingululwa, hake li mokuwoko kwomweengeli ngoka ngwaa kulama melunga nokombanda yohi.”

⁹Ame mba ya komweengeli, he mu heele a mpe okadhingwambo. Ye wa ntjeela ha tyaa: “Ke tambula, u ke lye po. Motjinyo ka nyeta ngoutji iya medhimo make ku hike.”

¹⁰Iya mba itha mo okadhingwambo mokuwoko kwomweengeli, he ke li po. Motjinyo ka li aka nyeta ngoutji. Iya himbe ke n̯in̯a, ka li ama ka hike medhimo.

¹¹Iya mba heelwa haku tiwaa: “U tha okupopya uke himatji ka ningilwa oviwan̯a ovingi, omihoko omingi, omalaka omengi nodhohamba odhingi.”