Read zemba Eholololo 14 Bible Online

Eholololo 14 - zemba bible

Eholololo 14

¹Ame mba tala, he mono Ondjona ndjaa kulama kondundu yaSion. Kwa li ovantu omayovi ethele nomilongo vine navane, mbava li pamo nOndjona, va sonekwa ena lyOndjona nolyaIhe yOndjona modhompomo dhawo!

²Mba tyaa ondaka ndjaa dha meulu ndjimai ngala otjihoomo tjomeva omengi, yo mai ngala omutitimo wombula omunene, ondaka ndjimba tyaa ya li amai ngala oyovahiki wovihumba, amava hiki ovihumba vyawo.

³Iya va imba otjiimbo otjipe komeho yotjipunditumino nomovipathi vyovipuka vine mbii na omwenyo nomovipathi vyovanene. Kape na ngwaa li ama ulu okulilonga otjiimbo soka, kakele vala komayovi ethele nomilongo vine navane aveika, mboka mbava yowolwa kombanda yohi.

⁴Iya ovantu hemba ovalumentu ovakohoki mbave litjaela movihulo, va ngala omuthukona wongendjo. Mava landula Ondjona apehe mpamai i. Wo va yowolwa mo movantu ovakwawo. Owo ve li ngovinyango vyolutenga mbimavi yambwa Kalunga nOndjona.

⁵Kava teekele amava popi ovithithi, wo kave na tja ombedhi.

⁶Mba mona omweengeli umo ngwaa li ama tuka pokati keulu. Wa li nondaka ombwa yaapehe okuteethela mboka mbava kala kombanda yohi, ovantu avehe noviwan̯a avihe nomihoko avihe nomalaka aehe.

⁷Wa popya nondaka onene ha tyaa: “Tilen̯i Kalunga, n̯e mu mu pe etumbalo, mena lyokutya owola yekoyo lye ye ya. Tumbaleken̯i ngwaa uta ohi neulu nelunga nodhothimo dhomeva.”

⁸Kwa landula uke omweengeli omutyavali ha tyaa: “Babilon otjinene tja han̯auka po, tja han̯auka po, mena lyokutya tja nwitha oviwan̯a avihe ovinyu vyoluyuma lwovihulo vyatjo.”

⁹Omweengeli omutyatatu wa landula kovakwawo, ha popi nondaka onene ha tyaa: “Nguma tumbaleke otjithitu notjithika tjatjo, iya ma pewa otjihako mompomo ye ne kokuwoko kwe,

¹⁰ye ma ka nwa ovinyu vyoluyuma lwaKalunga mbihavi lumbwalumbilwe natja moneka yoluyuma lwaKalunga, ma ihamethwa momulilo nomosulfuri movipathi vyovaengeli ovadhilikwa nomovipathi vyOndjona.

¹¹Omwithi womulilo mboka mau ve ihametha, hau ningi ondungalunga katee apehe. Mboka mbava tumbaleka otjithitu notjithika tjatjo, mbava tambula otjihako tjena lyotjithitu kaava ka thuva out̯iku nomutenya.”

¹²Hehi matji tya ovantu ovadhilikwa va thele okulikambulithila nokutakametha ovitumino vyaKalunga nokwiitavela muJesus.

¹³Mba tyaa ondaka ndjaa dha meulu, hai tyaa: “Soneka otjipuka hehi okutya ovanalao ovat̯e mbava t̯ila muMuhona okudha ndino katee apehe!” Ombepo mai popi hai tyaa: “Iinga otjatjili, mava ka thuva koudheu wovilinga vyawo, mena lyokutya ovilinga vyawo mavi ve landula.”

¹⁴Ame mba tala, he mono ekaka epembadhi, kombanda yekaka kwa li aku na ngwaa kala ko pohi nguma ngala Omuna wOmuntu, komutwe we u na ohala yotjingoldo, mokuwoko kwe u na onkiki ndjaa twa.

¹⁵Omweengeli omukwawo wa dha motempeli, ha wololokele ngwaa kala pohi kekaka nondaka onene ha tyaa: “Tuma onkiki yoye, u teye, mena lyokutya owola yokuteya ye thiki, neteyo lyokombanda yohi lye thiki.”

¹⁶Iya ngwaa li aa kala pohi kekaka, wa yumba onkiki ye kombanda yohi, okuteya haku pu.

¹⁷Omweengeli omukwawo wa dha motempeli yomeulu, naye wo wa li nonkiki ndjaa twa.

¹⁸Omweengeli omukwawo ngoka ngwaa li netumino lyomulilo, wa dha motjiyambelo, ha popi nangoka ngwaa li nonkiki ndjaa twa, ha popi nondaka onene ha tyaa: “Tuma onkiki yoye ndjaa twa, u ongedhe omahila omuvinyu okombanda yohi, mena lyokutya omandjembele ao a pi!”

¹⁹Omweengeli wa yumba onkiki ye kombanda yohi. Wa ongedha omahila omuvinyu wokombanda yohi, he e yumbu motjikolelo[3] otjinene tjoluyuma lwaKalunga.

²⁰Otjikolelo tja li kotjila tjotjitungwalongo, hamu kolelwa. Iya motjikolelo mwa dha omukungu wombindhi mbuu na oule wodhokilometa omathele atatu noule womohi wometa imo nentinge.