Read zemba Eholololo 15 Bible Online

Eholololo 15 - zemba bible

Eholololo 15

¹Ame mba mona meulu etangan̯eko ekwawo enene ekumithi. Ovaengeli epanduvali va li novipo epanduvali vyathiinina, mena lyokutya oluyuma lwaKalunga omo lwa pwila muvyo.

²Mba mona otjipuka himatji ngala elunga ndimali laima ngekende ndyaa lumbalumba nomulilo. Mba mona mbava ton̯a otjithitu notjithika tjatjo nonomola yena lyatjo. Mbava ton̯a va kulama melunga ndimali laima ngekende, ave na ovihumba mbiva pewa kuKalunga.

³Va imba otjiimbo tjaMoses, omuntu waKalunga, va imba hitja imbwa kOndjona hava tyaa: “Ovilinga vyoye ovinene vyo ovikumithi, Muhona Kalunga Omutuminiwaavihe. Odhondjila dhoye dha vyuuka dho odhatjatjili, Hamba yoviwan̯a.

⁴Aan̯i nguhame ku tila, Muhona? Aan̯i nguhama tumbaleke ena lyoye? Iya mena lyokutya oove u li vala aika Omudhilikwa, oviwan̯a avihe mavi ya kotjipala tjoye, havi ku tumbaleke, mena lyokutya ovilinga vyoye vyouvyuuki vye ya poluhandja.”

⁵Kon̯ima yovipuka hembi mba mona otempeli ndjaa li aya yeluka meulu, otenda ndjii yulika okutya Kalunga u li mokati kawo.

⁶Ovaengeli epanduvali mbava li novipo epanduvali, va dha motempeli ava dhala omidhalo omipembadhi vyodholina mbimavi laima, ava kutwa nomakwamo otjingoldo modhontulo.

⁷Iya tjimo tjomovipuka vine mbii na omwenyo tja pa ovaengeli epanduvali omalonga otjingoldo epanduvali ngae yula oluyuma lwaKalunga nguu na omwenyo apehe katee apehe.

⁸Otempeli ya li aye yula omwithi mbumau dhi metumbalo lyaKalunga nomodhonkono dhe. Kape na tja noumo ngwaa li ama ulu okuhita motempeli, tainkolo ovipo epanduvali vyovaengeli epanduvali háviya hwithilwa po.