Read zemba Eholololo 16 Bible Online

Eholololo 16 - zemba bible

Eholololo 16

¹Mba tyaa ondaka onene ndjimai dhi motempeli, ya heela ovaengeli epanduvali hai tyaa: “Enden̯i mu ka tile omalonga oluyuma lwaKalunga kombanda yohi.”

²Omweengeli wolutenga wa ya, ha tile elonga lye kombanda yohi. Ovantu mboka mbava li notjihako tjotjithitu nambava tumbaleka otjithika tjatjo, va tumba oviwalo ovivi navi.

³Omweengeli omutyavali wa tila elonga lye melunga. Elunga lya ila ombindhi ngoyomuntu ngwaa t̯i, atjihe hitja li nomwenyo melunga hatji t̯ile mo.

⁴Omweengeli omutyatatu wa tila elonga lye momilonga nomodhothimo dhomeva, havi ile ombindhi.

⁵Ame mba tyaa omweengeli nguu tumina omeva, wa popya ha tyaa: “Ove umuvyuuki, ove nguu li ko, nguwa li ko, ove uMudhilikwa, mena lyokutya ovipuka hembi we vi koyo hinyahi.

⁶Iya mena lyokutya va tila ombindhi yovantu ovadhilikwa noyovaprofeti, we ve nwitha ombindhi, otjo va hala.”

⁷Mba tyaa ondaka onkwawo ndjaa dha motjiyambelo hai tyaa: “Iinga, Muhona Kalunga Omutuminiwaavihe, ekoyo lyoye olyatjatjili, lyo lya vyuuka.”

⁸Omweengeli omutyane wa tila elonga lye ketango. Etango lya pewa odhonkono okuhika ovantu nomulilo.

⁹Oupyu ounene wa hika ovantu, ovantu hava penye ena lyaKalunga nguu na odhonkono kovipo hembi. Wo kave liteyululile, va pe Kalunga etumbalo.

¹⁰Omweengeli omutyatano wa tila elonga lye kotjipunditumino tjotjithitu. Iya otjilongo tjotjithitu tja kala met̯iku, ovantu ve lilumata omalaka mena lyoviihamo.

¹¹Iya va penya Kalunga owomeulu, mena lyoviihamo vyawo nomena lyoviwalo vyawo, wo kave liteyululile kovilinga vyawo ovivi.

¹²Omweengeli omutyapandu wa tila elonga lye momulonga omunene waEufrat. Iya omeva omulonga a tena, opo pa longekedhelwe odhohamba ondjila ndhimadhi dhi koutjilo.

¹³Mba mona odhombepo ndatu odhombi ndhimadhi ngala omathuma, madhi dhi motjinyo tjetjithi nomotjinyo tjotjithitu nomotjinyo tjomuprofeti wovithithi.

¹⁴Iya dho odhombepo dhodhondemoni ndhii ninga omatangan̯eko, madhi i oku ka onga odhohamba adhihe dhokombanda yohi, dhi ka lwe ovita metango enene lyaKalunga Omutuminiwaavihe.

¹⁵“Taa tuutuu, ame me ya ngotjimpulu, omunalao onguma pathumuka, ha takametha omidhalo vye, opo há ende nyahinya, ye a t̯e ohon̯i movipathi vyovantu avehe.”

¹⁶Iya odhombepo dha ongedhela odhohamba poluvedhe, mOtjiheberi nduu tiwa Armagedon.

¹⁷Omweengeli omutyapanduvali wa tila elonga lye mombepo. Iya ondaka onene ya dha motjipunditumino motempeli hai tyaa: “Tja ningwa!”

¹⁸Iya pa li omalukeno nomipopyo nomititimo vyombula neteketo lyohi enene. Kakuya moneka nalukulu eteketo ndii li nyahoka okudha keuto lyomuntu.

¹⁹Iya otjitungwalongo soka otjinene tja pambuka movipambu vitatu, novitungwalongo vyoviwan̯a vya han̯auka. Babilon otjinene tja thipalukwa kuKalunga, he tji pa oneka yovinyu vyoluyuma lwe lwomadhinge.

²⁰Odhompanga adhihe dha inkola, nodhondundu adhihe ahamadhi moneka.

²¹Omawe omanene odhompawe, limo lya li nodhokilograma omilongo vine, a lauka keulu, haa wile kombanda yovantu. Ovantu va penya Kalunga mena lyotjipo hehi tjodhompawe. Iya otjipo hehi tja li otjinene unene.