Read zemba Eholololo 17 Bible Online

Eholololo 17 - zemba bible

Eholololo 17

¹Omweengeli umo womovaengeli epanduvali mbava li nomalonga epanduvali we ya kwaame, ha popi naame ha tyaa: “Indjo, ndji ku yulikile ekunga enene ndyaa kala pohi kombanda yomeva omengi himali koywa.

²Odhohamba dhokombanda yohi dha lala nalyo, novantu wokombanda yohi va pyaluka kovinyu vyovihulo vyalyo.”

³Mba kambulwa kOmbepo, omweengeli ha ntwala mokuti. Iya mba mona omukadhintu ngwaa kala pohi kotjithitu otjithilantu, hitje yula omana okupenya, hitji na omitwe epanduvali nodhonyaa omulongo.

⁴Omukadhintu wa dhala omudhalo wopurpuri nomudhalo omuthilantu, hau thevekwa notjingoldo nomawe omawa okalu nomakwalali. Iya mokuwoko kwe mwa li oneka yotjingoldo ndjee yula ovipuka mbimavi toyetha novipuka vyosilo vyovihulo vye.

⁵Mompomo yomukadhintu mwa sonekwa ena eholekwa: “Babilon otjinene, ina yomakunga aehe noyovipuka avihe vyokutoyetha vyokombanda yohi.”

⁶Mba mona okutya omukadhintu wa pyaluka ombindhi yovantu ovadhilikwa nombindhi yodhombangi dhaJesus. Himbe mu mono, mbe kumwa unene.

⁷Omweengeli wa ntjeela ha tyaa: “We kuminwa tji? Ame me ku heele otjiholekwa tjomukadhintu notjotjithitu hitje mu tjindi, hitji na omitwe epanduvali nodhonyaa omulongo.

⁸Otjithitu soka hiwa mono oko tja li, napano katji ko, iya tji li pokwiinduka menkomototo, atjaa matji ka han̯aunwa po. Mbava kala kombanda yohi, mbahava sonekelwe omana awo membo lyomwenyo okudha keuto lyouye, mave ke kumwa himava ka mona otjithitu okutya oko tja li, napano katji ko, iya matji ke ya.

⁹“Hehi matji pula omaeli nodhondunge. Omitwe epanduvali mavi tya odhondundu epanduvali hoka hukwa kala pohi omukadhintu. Omitwe hembi mavi tya wo odhohamba epanduvali.

¹⁰Odhohamba ntano dha t̯a, imo opo i li, onkwawo kaiye ya. Iya himai ya, mai ka tumina vala okaluvedhe okanunu.

¹¹Otjithitu hitja li ko, napano katji ko, iya matji ka ila ohamba ontyapandutatu ndjaa li imo yomodhohamba hendhinya epanduvali ndhaa li ko, iya matji ka han̯aunwa po.

¹²“Odhonyaa omulongo ndhiwa mono, odhohamba omulongo ndhiihadhiya vyaala ovilongo, atjaa madhi ka pewa odhonkono dhokutumina ngodhohamba oule wowola imo pamo notjithitu.

¹³Dho adhihe omulongo dha li nompango imo, dhi ka yandje etumino lyadho nodhonkono dhadho kotjithitu.

¹⁴Otjithitu nodhohamba madhi ka lwitha Ondjona. Ondjona pamo novaithanwa novaholowolwa novaliun̯ikwa mai ke dhi ton̯a, mena lyokutya oye e li Muhona wovahona, Ohamba yodhohamba.”

¹⁵Omweengeli wa ntjeela ha tyaa: “Omeva ngawa mono, ekunga hulya kala pohi, matji tya ovantu, omangundwa, oviwan̯a nomalaka.

¹⁶Odhonyaa omulongo ndhiwa mono, notjithitu hiwa mono, avihe hembi mavi ka kala avi yele ekunga. Mave ke li dhula atjihe hili na tjo, have li thii nyahinya. Mava ka lya onyama yekunga, have li hike po momulilo.

¹⁷Iya Kalunga wa twaa ehalo lye momitima vyawo, va pange ompango imo, va yandje etumino lyawo kotjithitu, katee odhondaka dhaKalunga madhi hwithilwa po.

¹⁸“Omukadhintu nguwa mono, oye e li otjitungwalongo otjinene hitji tumina odhohamba adhihe kombanda yohi.”