Read zemba Eholololo 2 Bible Online

Eholololo 2 - zemba bible

Eholololo 2

¹“Sonekela omweengeli weongalo lyokoEfeso, u tyee: “Nguu na odhonyothi epanduvali mokuwoko kwe kwokokulyo, nguma ende pokati kovituliko vyodholamba vyotjingoldo epanduvali, ma tyaa:

²Ovilinga vyoye ndji vi i, ndji tji i okutya u undapa unene, elikambulithilo lyoye ndji li i, ku liyethele okukala mokati kovantu ovavi. Mbave litya ovayapostoli, wo háve thi ovayapostoli, u ve thongonona nawa, u ve mona okutya odhonkembi.

³U likambulithila, wa tjinda oudheu mena lyena lyandje, atjaa ku ulilwe.

⁴Iya ndji na elaka naove, hiwa yetha ohole yoye yolutenga.

⁵Iya thipaluka okutjuna kwoye mon̯ima mpaku lithike, ove u liteyulule, u undape ovilinga vyoye vyolutenga. Iya andaa hatjo, me ya kwoove, he itha po otjituliko tjoye tjolamba polukalo lwatjo, andaa koo liteyulula.

⁶Iya u na wo tuu otjiwa hiuu undapa. Ovilinga vyOvanikolaiti u vi yele, naame wo ndji vi yele.

⁷“Nguu na omatwi, nga tyee Ombepo himai heele omaongalo! “Nguma ton̯a, me ke mu pa, a lye komuti womwenyo mbuu li mOparadisa yaKalunga.

⁸“Iya sonekela omweengeli weongalo lyokoSmirna u tyee: “Omutenga nomuthiinina, ngoka ngwaa t̯ile, iya napano nguu na omwenyo, ma tyaa:

⁹“Oudheu nouthona woye ndji u i, iya atjaa ove umuhona. Omapenyo ovantu mboka mbave litya Ovajuda, wo háve thi Ovajuda, ndji e i, iya wo osinagoga yaSatana.

¹⁰Hó tila ovipuka mbimo tatethelwa. Taa tuutuu, omudiapoli ma ka yedhilila vamo owomun̯e mokaliwoso, mu lolwe, n̯e mu ka monethwe ovihuna omatango omulongo. Kala omuliun̯ikwa katee ket̯o. Ame me ke ku pa ohala yomwenyo.

¹¹“Iya nguu na omatwi, nga tyee Ombepo himai heele omaongalo! “Nguma ton̯a, kaa ka ihamekwa ket̯o etyavali.

¹²“Iya sonekela omweengeli weongalo lyokoPergamo, u tyee: “Nguu na omukonda mbwaa twa kuvali ma tyaa:

¹³Mpa u kala, ndji pe i, potjipunditumino tjaSatana, atjaa wa kambulitha ena lyandje. Ku litendelele okwiitavela mwaame nopomatango aAntipas, ombangi yandje, omuliun̯ikwa, ngwaa dhipaelwa mokati ken̯i, mpapa kala Satana.

¹⁴Iya ndji na oupuka oununu oku ku heela, mena lyokutya u na ovantu vamo mbava kambulitha elongo lyaBileam. Bileam wa longa Balak, a tele Ovaisraeli omoo, va lye onyama yombaveka nokulitwaa movihulo.

¹⁵Iya u na wo ovantu mbava kambulitha hinyahi elongo lyOvanikolaiti.

¹⁶Iya liteyulula! Iya andaa hatjo, me ku thaukile, ovantu mboka he ve lwitha neonga ndimali dhi motjinyo tjandje.

¹⁷“Nguu na omatwi, nga tyee Ombepo himai heele omaongalo! “Nguma ton̯a, me mu pa omanna ndjaa holekwa. Me mu pa ewe epembadhi, mewe moka omo me soneke ena epe. Kape na tja omuntu noumo ngume li iwa, kakele vala komuntu ngoka ngume li pewa.

¹⁸“Iya sonekela omweengeli weongalo lyokoTiatira, u tyee: “OmunwaKalunga, nguu na omeho ngaa ngala omalakulaku omulilo, nodhompadhi dhe ndhii ngala otjivela otjindumbu hitja pupyala, ma tyaa:

¹⁹Ovilinga vyoye ndji vi i, nohole yoye neitavelo lyoye novilinga vyoye vyonkenda nelikambulithilo lyoye ndji li i. Ovilinga vyoye vyathiinina ovingi unene okupon̯a ovyolutenga.

²⁰Iya ndji na elaka naove, mena lyokutya wa yetha omukadhintu nguu tiwa Isabel, nguu litya omuprofeti, a longe, ye a kembele po ovantu vandje, ve litwee movihulo, wo va lye ombaveka.

²¹Iya ame mbe mu pa oluvedhe okutya e liteyulule, atjaa ye ka hala okuliteyulula, a yethe ovihulo vye.

²²Taa tuutuu, me mu yumbu ouvela womotjiyalo, nambave livaka naye, me ve twaa moudheu ounene, andaa kaave liteyulula, va yethe ovilinga vyawo nomukadhintu ngoka,

²³nodhondele dhomukadhintu ngoka me ve dhipaa. Omaongalo aehe maa ka iwa okutya aame ndji thongonona omalipulo nomitima, auhe ndji mu pa hitji lithike povilinga vye.

²⁴“Iya n̯e vamo owomoTiatira, amuhe mbahamu tambulile elongo hendi evi, mbahamu i ‘Oviholekwa vyaSatana’ ngahi va popya, me mu heele okutya híme mu twike omutenge umo,

²⁵kambulithen̯i vala soka himu na tjo katee ame me ya.

²⁶Nguma ton̯a, ye ha takametha ovilinga vyandje katee pehulilo, me mu pa etumino okutumina oviwan̯a.

²⁷Ye me vi litha nonkunye yotjivela. Me vi nyanyauna ngomume wodhombiya hiaa nyanyauna odhombiya.

²⁸Iya me mu pa onyothi yomuhuka ngaame wo himba pewa etumino hendi kuTate.

²⁹“Nguu na omatwi, nga tyee Ombepo himai heele omaongalo!