Read zemba Eholololo 21 Bible Online

Eholololo 21 - zemba bible

Eholololo 21

¹Mba mona eulu epe nohi ompe, mena lyokutya eulu lyolutenga nohi yolutenga vya hula, nelunga kali ko uke.

²Mba mona otjitungwalongo otjidhilikwa, Jerusalem otjipe, amatji dhi meulu kuKalunga, tja longekedhwa ngomuthuko ama longekedhelwa omulumentu we.

³Mba tyaa ondaka onene ndjimai dhi motjipunditumino hai tyaa: “Taa tuutuu, onganda yaKalunga i li povantu! Ye ma ka kala pamo nawo, mava ka kala ovantu ve. Kalunga omwene ma ka kala pamo nawo, ma ka kala Kalunga kawo.

⁴Ma ka theta po omihodhi avihe pomeho awo. Kaaku ka kala uke et̯o ne omukoti ne otjililo ne oviihamo kaavi ka kala ko uke, mena lyokutya ovipuka vyolutenga vya hulu.”

⁵Ngwaa li aa kala pohi kotjipunditumino wa popya ha tyaa: “Taa tuutuu, ovipuka avihe me vi ningi ovipe.” Wa popya ha tyaa: “Soneka, ovipuka hembi, mena lyokutya odhondaka hendhi odhatjatjili dho dhi tjiiwa okuliun̯ikwa.”

⁶Wa ntjeela uke ha tyaa: “Tja ningwa! Aame Alfa naOmega, eutilo nehulilo, ngwaa t̯i onyota, me mu pa omeva mothimo yomeva omanamwenyo otjali.

⁷Nguma ton̯a, ma ka pingana ovipuka hembi, ame me ka kala Kalunga ke, ye ma ka kala omunwandje.

⁸Iya mbava lya owoma nambahave na eitavelo, novalisiliki novadhipai nambave hole ovihulo, nodhompule novatumbaleki wovikalunga, nodhonkembi adhihe, oluvedhe lwawo malu ka kala melunga lyomulilo nosulfuri, ndyoka ndimali ka kala et̯o etyavali.”

⁹Iya umo owomovaengeli epanduvali mbave na omalonga epanduvali ngae yula ovipo epanduvali vyathiinina, we ya, ha popi naame ha tyaa: “Indjo huno, ndji ku yulikile omuthuko, omukadhintu wOndjona.”

¹⁰Mba kambulwa kOmbepo, hai ntwala kondundu onene onde. Yo ya ndjulikila otjitungwalongo otjidhilikwa, Jerusalem amatji dhi meulu kuKalunga,

¹¹hitji na etumbalo lyaKalunga, hitji laima ngokawe hake na okalu, ngojaspis, ndjii laima ngekende lyokristali.

¹²Tja kondolokwa kekuma enene ele ndii na omivelo omulongo navivali. Pomuvelo auhe pa li omweengeli, nomana ngaa sonekwa ko, henga omaanda omulongo naavali ovanwaIsrael.

¹³Okudha koutjilo omivelo vitatu, okudha komakulyo otjilongo omivelo vitatu, okudha komakumbinda otjilongo omivelo vitatu, nokoutokelo omivelo vitatu.

¹⁴Ekuma lyotjitungwalongo li na omakulameno omulongo naavali. Komakulameno ku na omana omulongo naavali ovayapostoli omulongo navavali wOndjona.

¹⁵Omweengeli ngwaa popya naame, wa li notjisawa tjotjingoldo tjokuyeleka otjitungwalongo nomivelo vyatjo nekuma lyatjo.

¹⁶Otjitungwalongo tja li nodhombinga ne ndhii lithike, oule watjo u lithike nomutamo. Omweengeli wa yeleka otjitungwalongo notjisawa, tja li noule wodhokilometa omayovi avali nomathele ane. Oule, nomutamo, noule wopeulu vi lithike.

¹⁷Omweengeli wa yeleka wo ekuma lyatjo, lya li noule wodhometa omilongo epandu, notjiyeleketho soka hiaa yeleketha.

¹⁸Ekuma lya tungilwe nojaspis, otjitungwalongo tja tungwa notjingoldo otjenetjene hitja kohoka ngekende.

¹⁹Omakulameno omakuma otjitungwalongo e thevekwa nomawe okalu omuhoko kwalukele. Ekulameno lyolutenga ojaspis, etyavali osafire, etyatatu okalkedon, etyane osmaragdi,

²⁰etyatano osardoniks, etyapandu osardion, etyapanduvali okrisoliti, etyapandutatu oberili, etyamoovi otopasi, etyamulongo okrisopraisi, etyamulongo nalimo ohiakinti, etyamulongo netyavali oametisti.

²¹Iya omivelo omulongo navivali omawe omulongo naavali, omuvelo auhe ewe limo. Omuvanda wotjitungwalongo wa tungwa notjingoldo otjenetjene hitja kohoka ngekende.

²²Ame hí mwene mo otempeli motjitungwalongo soka, mena lyokutya Muhona Kalunga Omutuminiwaavihe nOndjona owo ve li otempeli yatjo.

²³Otjitungwalongo soka katji hepele okutungatelwa netango ne nomwedhi, mena lyokutya elaimo lyaKalunga mali tji laimine, Ondjona oyo i li olamba yatjo.

²⁴Oviwan̯a mavi ka enda motjiten̯i tjatjo, odhohamba dhokombanda yohi madhi eta mo etumbalo lyadho.

²⁵Omivelo vyotjitungwalongo soka komutenya kaavi ka yedhilwa uke, mena lyokutya kaaku ka kala uke out̯iku.

²⁶Motjitungwalongo moka mamu ka etwa ovipuka ovingi oviwa nomauhona oviwan̯a.

²⁷Iya soka hitja sila kaatji hiti mo nokanunu. Auhe nguu undapa ovilinga mbii toyetha kaa hiti mo ne nguu popya ovithithi. Mamu hiti vala mbava sonekwa membo lyomwenyo lyOndjona.