Read zemba Eholololo 22 Bible Online

Eholololo 22 - zemba bible

Eholololo 22

¹Iya omweengeli wa ndjulikila omulonga womeva omanamwenyo ngamaa laima ngokristali, mbumau thuluka motjipunditumino tjaKalunga notjOndjona,

²wa kunguluka pokati komuvanda wotjitungwalongo. Kodhontyo dhomulonga kwa li omuti womwenyo mbuu ma ovikando omulongo navivali mombula, momwedhi auhe u ma ovinyango, omatho omuti mboka ookuvelula oviwan̯a.

³Motjitungwalongo moka kaamu ka kala uke ethingo. Mamu ka kala otjipunditumino tjaKalunga notjOndjona. Iya ovantu ve mave ke mu undapela.

⁴Mava ka kala amava tala otjipala tje, nena lye mali ka kala modhompomo dhawo.

⁵Kaaku ka kala out̯iku, ovantu vaKalunga kaava ka hepa uke otjiten̯i tjolamba ne otjiten̯i tjetango, mena lyokutya Muhona Kalunga oye e li otjiten̯i tjawo. Iya mava ka tumina ngodhohamba apehe katee apehe.

⁶Omweengeli wa ntjeela ha tyaa: “Odhondaka ndhika dhi tji i okuliun̯ikwa, dho odhatjatjili. Muhona, Kalunga wodhombepo dhovaprofeti, wa tuma omweengeli we okuyulikila ovantu ve ovipuka mbimavi ka ningwa dhiva.”

⁷Jesus wa popya ha tyaa: “Taa tuutuu, ame me ya dhiva. Omunalao onguma takametha odhondaka dhouprofeti wembo hendi.”

⁸Iya aame Johannes ngoka ngumba tyaa, ye ngumba mona ovipuka hembi avihe. Iya himba tee nahimba mono ovipuka hembi, mba wila podhompadhi dhomweengeli ngwaa ndjulikila ovipuka hembi ndji mu tumbaleke.

⁹Ye wa ntjeela ha tyaa: “Taa tuutuu, hó ningi nyahoka! Ame ndji ngala vala ove ndjimukwen̯i ngovakwen̯i ovaprofeti novantu mboka mbava takametha odhondaka dhomembo hendi. Tumbaleka Kalunga.”

¹⁰Wa ntjeela ha tyaa: “Odhondaka dhouprofeti wembo hendi hó dhi holeke, mena lyokutya otembu i li popedhi.

¹¹Nguma undapa oulundhi, nga undape oulundhi, ngume lisilike, nge lisilike. Iya omuvyuuki nga undape ouvyuuki, omudhilikwa nge lidhilike.”

¹²Jesus wa popya ha tyaa “Taa tuutuu, ame me ya dhiva. Ondjambi yandje ndji na yo okupa auhe hitji lithike povilinga vye.

¹³Aame Alfa naOmega, omutenga nomuthiinina, eutilo nehulilo.”

¹⁴Ovanalao ombava koha omidhalo vyawo, opo va itavelelwe okulya ovinyango vyomuti womwenyo, wo va hite motjitungwalongo amava pitile momivelo.

¹⁵Iya kotjila tjotjitungwalongo maku ka kala odhombwa, nodhompule nambave hole ovihulo, novadhipai, novatumbaleki wovikalunga, nambave hole ovithithi, nodhonkembi.

¹⁶“Aame Jesus, mba tuma omweengeli wandje, e mu hipululile ovipuka mbyoka momaongalo. Aame ontekulona yomoluyumuko lwaDavid, onyothi yomuhuka ndjii laima.”

¹⁷Ombepo nomukupwa mava tyaa: “Indjo!” Ngume tji tee, nga tyee: “Indjo!” Ngwaa t̯i onyota, nge ye. Nguma hala, nga tambule omeva omanamwenyo otjali.

¹⁸Aame Johannes, me londola auhe nguma tee odhondaka dhouprofeti wembo hendi okutya andaa pe na nguma wedha ko tja kudho, Kalunga me ke mu wedhela ko kovipo mbyaa sonekwa membo hendi.

¹⁹Iya andaa modhondaka dhouprofeti wembo hendi pe na nguma itha mo tja, Kalunga kee ke mu yetha a lye ovinyango vyomuti womwenyo, ye kaa ka kala motjitungwalongo otjidhilikwa ngahi tja sonekwa membo hendi.

²⁰Nguma popi ovipuka hembi ma tyaa: “Iinga, ame me ya dhiva.” Amen. Muhona Jesus, indjo!

²¹Et̯ilonkenda lyaMuhona Jesus ngali kale nan̯e amuhe. Amen.