Read zemba Eholololo 6 Bible Online

Eholololo 6 - zemba bible

Eholololo 6

¹Ame mba mona Ondjona himai kakula ko otjilimbo tjimo tjomovilimbo epanduvali. Mba tyaa otjipuka tjimo tjomovipuka vine mbii na omwenyo, tja popya nondaka ndjimai ngala omutitimo wombula hatji tyaa: “Indjo!”

²Iya ame mba tala, he mono onkambe ompembadhi, ngwaa li ae i kavile, wa li nodhohewo, wa pewa ohala. Wa ya, a ka ton̯e outon̯i.

³Iya Ondjona hiya kakula ko otjilimbo otjityavali, mba tyaa otjipuka otjityavali hitji na omwenyo, hatji tyaa: “Indjo!”

⁴Kwe ya onkambe onkwawo othilantu, ngwaa li ae i kavile wa pewa odhonkono a ete ovita kombanda yohi, ovantu opo ve lidhipae. Wa pewa omukonda omunene.

⁵Ondjona hiya kakula ko otjilimbo otjityatatu, mba tyaa otjipuka otjityatatu hitji na omwenyo hatji tyaa: “Indjo!” Iya taa tuutuu, mba mona onkambe ondholodhi, ngwaa li ae i kavile, wa li notjiyeleketho mokuwoko kwe.

⁶Mba tyaa otjipuka himatji ngala ondaka pokati kovipuka vine mbii na omwenyo hai tyaa: “Okambala kohenga yomahangu maka i ondenari, noumbala utatu wohenga yomaha mau i ondenari imo, iya omadhi novinyu hó vi yono.”

⁷Ondjona hiya kakula ko otjilimbo otjityane, mba tyaa ondaka yotjipuka otjityane hitji na omwenyo hai tyaa: “Indjo!”

⁸Taa tuutuu, mba mona onkambe ombahe, ngwaa li ae i kavile, u tiwa Et̯o. Otjovat̯e tji kala amatji mu landula. Iya Et̯o nOtjovat̯e vya pewa etumino okutumina otjityane tjohi nokudhipaa ovantu movita, kondjala, kouvela nokovithitu vyokombanda yohi.

⁹Ondjona hiya kakula ko otjilimbo otjityatano, mba mona kohi yotjiyambelo omienyo vyovantu mbava dhipawa mena lyodhondaka dhaKalunga nomena lyoumbangi wawo hiva kala ovakambulithi.

¹⁰Va wololoka unene hava tyaa: “Muhona Omunadhonkonoadhihe Omudhilikwa, Owatjatjili! Ovantu wokombanda yohi mbave tu dhipaa, mo ve kambulile onkongo, ho ve koyo nalun̯i?”

¹¹Iya auhe owomuwo wa pewa omudhalo omupembadhi omule. Va heelwa okutya mave tji thuva po kanunu katee otjihavelo tjovakwawo notjovapika vaKalunga ovakwawo mbava thele okudhipawa ngawo matji hwile po wo.

¹²Mba mona Ondjona himai kakula ko otjilimbo otjityapandu. Pa li eteketo lyohi enene, etango lya dhiwelele ngomudhalo wokudhula, nomwedhi auhe wa li amau ngala ombindhi.

¹³Odhonyothi keulu dha wa ko, hadhi wile pohi ngomankula omukuyu aa hathumunwa kombepo onene.

¹⁴Eulu lya li alya dhi po, mali ngala edhingwambo alya dhingwa. Odhondundu adhihe nodhompanga dha li adha ithwa po pomalukalo adho.

¹⁵Odhohamba dhokombanda yohi novanenentu novanene wovakwavita novahona novanankono novapika avehe nambahave thi ovapika va holama momaleva nomomankewo odhondundu.

¹⁶Va heela odhondundu nomawe hava tyaa: “Tu wilen̯i, mu tu holeke, opo hátu moneka kuhengu ngwaa kala pohi kotjipunditumino, nt̯e opo hátu vadhwa koluyuma lwOndjona.

¹⁷Iya mena lyokutya etango enene lyoluyuma lwawo lye ya, aan̯i nguma ulu okukulama?”