Read zemba Eholololo 7 Bible Online

Eholololo 7 - zemba bible

Eholololo 7

¹Kon̯ima yovipuka hembi mba mona ovaengeli vane mbava kulama kodhontyo ne dhohi, hava tjaele odhombepo ne dhokodhontyo, opo hádhi pepe uke kombanda yohi ne yelunga ne komuti noumo.

²Mba mona omweengeli omukwawo ama dhi nokoutjilo, wa li notjilimbo tjaKalunga omunamwenyo. Wa wololokela ovaengeli mboka vane, mboka mbava pewa odhonkono okuyona ohi nelunga,

³ha tyaa: “Hámu yono ohi ne elunga ne omiti, tainkolo hátuya twaa ovantu vaKalunga ketu otjilimbo modhompomo dhawo.”

⁴Iya mba tyaa otjihavelo tjambava tuwa otjilimbo okutya tja li omayovi ethele nomilongo vine nane (144 000). Mbava tuwa otjilimbo va dha momaanda aehe Ovaisraeli.

⁵Owomeanda lyaJuda mbava tuwa otjilimbo, omayovi omulongo naavali, owomeanda lyaRuben omayovi omulongo naavali, owomeanda lyaGad omayovi omulongo naavali,

⁶owomeanda lyaAsser omayovi omulongo naavali, owomeanda lyaNaftali omayovi omulongo naavali, owomeanda lyaManasse omayovi omulongo naavali,

⁷owomeanda lyaSimeon omayovi omulongo naavali, owomeanda lyaLevi omayovi omulongo naavali, owomeanda lyaIsaskar omayovi omulongo naavali,

⁸owomeanda lyaSebulon omayovi omulongo naavali, owomeanda lyaJosef omayovi omulongo naavali, owomeanda lyaBenjamin mbava tuwa otjilimbo, omayovi omulongo naavali.

⁹Kon̯ima yovipuka hembi mba mona engundwa enene ndihamali ulu okuhawa. Wo va dha movantu avehe womoviwan̯a avihe nomihoko avihe nomomalaka aehe. Va li ava kulama komeho yotjipunditumino nokomeho yOndjona, va dhalekwa omidhalo omipembadhi, wo va li nomavale momawoko awo.

¹⁰Iya va wololoka unene hava tyaa: “Ehupitho mali dhi kuKalunga ketu ngwaa kala pohi kotjipunditumino, lyo mali dhi wo kOndjona!”

¹¹Ovaengeli avehe va li ava kulama, ava kondoloka otjipunditumino novanene novipuka vine mbii na omwenyo. Ve lit̯imika po komeho yotjipunditumino, hava tumbaleke Kalunga

¹²hava tyaa: “Amen! Ehiviliko netumbalo nounongo nompandu netumbaleko netumino nodhonkono odhaKalunga ketu apehe katee apehe! Amen!”

¹³Iya umo owomovanene wa mpula ha tyaa: “Mbaka mbava dhala omidhalo omipembadhi owaan̯i, wo mava dhi pi?”

¹⁴Ame mbe mu yaka he tyaa: “Taa, ove u tji i.” Iya wa ntjeela ha tyaa: “Hemba ombamava dhi moudheu ounene, mbava koha omidhalo vyawo, have vi lwelulile mombindhi yOndjona.

¹⁵Iya wo ve li komeho yotjipunditumino tjaKalunga, mave mu undapele omutenya nout̯iku motempeli ye. Iya ngwaa li aa kala pohi kotjipunditumino ma dhiki esase lye lyoku ve amena.

¹⁶Wo kaava ka t̯a uke ondjala ne onyota, etango ne oupyu auhe kaau ke ve hika uke.

¹⁷Iya Ondjona ndjii li mokati kotjipunditumino mai ve litha, hai ve twala kodhothimo dhomeva omanamwenyo. Iya Kalunga ma theta po omihodhi avihe pomeho awo.”