Read zemba Eholololo 8 Bible Online

Eholololo 8 - zemba bible

Eholololo 8

¹Ondjona hiya kakula ko otjilimbo otjityapanduvali, meulu mwa li amwa nyimi oule wentinge lyowola.

²Mba mona ovaengeli epanduvali mbava kulama kotjipala tjaKalunga, va pewa odhonkwino epanduvali.

³Omweengeli omukwawo we ya, ha kulama potjiyambelo, wa li notjitwiimin̯ino tjotjingoldo, ha pewa ovitwiimin̯wa ovingi e vi twee momaalikano ovantu ovadhilikwa avehe kotjiyambelo tjotjingoldo, hitja li komeho yotjipunditumino.

⁴Omwithi wovitwiimin̯wa wa yeluluka pamo nomaalikano ovantu ovadhilikwa, wa dha mokuwoko kwomweengeli, amau vyuuka kotjipala tjaKalunga.

⁵Iya omweengeli wa itha otjitwiimin̯ino, he tji yulitha omulilo womotjiyambelo, he tji yumbu kombanda yohi. Iya pa li omititimo vyombula nomipopyo nomalukeno, ohi hai teketa.

⁶Ovaengeli epanduvali mbava li nodhonkwino epanduvali ve lilongekedha okuhika odhonkwino.

⁷Omweengeli wolutenga wa hika onkwino. Iya pe ya odhompawe nomulilo mbwaa lumbwalumbwa mumo nombindhi, havi yumbwa kombanda yohi. Otjityatatu tjohi tja pya po, notjityatatu tjomiti tja pya po, nehodhi etalala alihe lya pya po.

⁸Omweengeli omutyavali wa hika onkwino. Iya otjipuka otjinene hitja li amatji ngala ondundu ndjaa tema omulilo, tja yumbwa melunga. Otjityatatu tjelunga tja ila ombindhi.

⁹Iya otjityatatu tjomovipuka vyomomeva mbii na omwenyo tja t̯a, notjityatatu tjomodhombapolo tja han̯aunwa.

¹⁰Omweengeli omutyatatu wa hika onkwino. Iya keulu kwa wa onyothi onene ndjaa tema ngolamba. Ya wila kotjityatatu tjomilonga nokombanda yodhothimo dhomeva.

¹¹(Onyothi hendji i tiwa oYalula.) Otjityatatu tjomeva tja lula. Ovantu ovengi va t̯a komeva ngoka, mena lyokutya a lula.

¹²Omweengeli omutyane wa hika onkwino. Iya otjityatatu tjetango notjityatatu tjomwedhi notjityatatu tjodhonyothi tja tonwa, tjau otjityatatu tjavyo hatji dhiwele, notjityatatu tjotjitenya ahamatji moneka, notjit̯iku natjo wo hatjo tji kala.

¹³Ame mba mona, iya he tee onkuvi ndjimai tuka peulu, ya popya unene hai tyaa: “Utatyei! Utatyei! Utatyei ovantu mboka mbave thiwa kombanda yohi, odhonkwino dhovaengeli vatatu himadhi utu okupopya!”