Read zemba Eholololo 9 Bible Online

Eholololo 9 - zemba bible

Eholololo 9

¹Omweengeli omutyatano wa hika onkwino. Iya mba mona onyothi ndjaa wa meulu, hai wile kombanda yohi, hai pewa osapi yenkomototo ndyaa ka ululuka.

²Onyothi ya ikula enkomototo. Menkomototo mwa dha ondungalunga ndjimai ngala ondungalunga yekundungala enene. Iya etango lya dhiwelekwa kondungalunga yomenkomototo.

³Mondungalunga mwa dha otjimbonde, hatji ya kombanda yohi. Tja pewa odhonkono, ngodhonkono ndhii na onge kombanda yohi.

⁴Tja heelwa okutya hátji yono ehodhi lyokombanda yohi ne omiti ne otjitho atjihe. Iya ngatji ihamethe vala ovantu mbahave na tja otjilimbo tjaKalunga modhompomo dhawo.

⁵Otjimbonde tja heelwa okutya hátji ve dhipaa, iya ngatji ve ihamethe oule womiedhi vitano. Ngatji ve ihamethe ngahi tji ihametha onge aya lumata omuntu.

⁶Iya momatango ngoka ovantu mava ka kala amava taendha et̯o, atjaa kaave li mono. Mava ka kala amava hala okut̯a, atjaa et̯o mali ve inkolo.

⁷Iya olupe lwotjimbonde lwa li amalu ngala odhonkambe ndhaa longekedhelwa ovita, iya komitwe vyatjo tja li novipuka mbimavi ngala odhohala dhotjingoldo, ovipala vyatjo vya li ngovyovantu.

⁸Tja li nodhondjutji ngodhondjutji dhovakadhintu, nomayoo ngoodhonkeyama.

⁹Tja li nomudhalo wokontulo mbuu ngala omudhalo wokontulo wotjivela. Otjihoomo tjomavava atjo tja li amatji ngala omatemba ovita odhonkambe odhingi amadhi dhamukile kovita.

¹⁰Otjimbonde tji na omitjila mbii na oukuya kodhohulo ngodhonge. Momitjila vyatjo omo mu na odhonkono dhokwiihametha ovantu oule womiedhi vitano

¹¹Otjimbonde tji na ohamba yatjo, omweengeli wenkomototo. Ena lye mOtjiheberi u tiwa oAbaddon[2] mOtjigreka u tiwa oApollion.

¹²Utatyei, oudheu wolutenga wa piti. Utatyei, kon̯ima yovipuka hembi ku na uke omaudheu omakwawo avali ngamae ke ya.

¹³Iya omweengeli omutyapandu wa hika onkwino ontyapandu. Mba tyaa ondaka ndjimai dhi modhonyaa ne dhotjiyambelo tjotjingoldo hitji li kotjipala tja Kalunga,

¹⁴hai popitha omweengeli omutyapandu nguu na onkwino, hai tyaa: “Kutulula ovaengeli vane mbava kutilwa pomulonga omunene waEufrat.”

¹⁵Iya ovaengeli vane va kutululwa, va longekedhelwa owola, etango, omwedhi nombula okudhipaa otjityatatu tjovantu.

¹⁶Ame mba tyaa otjihavelo tjovakwavita wokodhonkambe, tja li omamiliyona omathele avali.

¹⁷Iya mba mona odhonkambe memoneko nambave dhi kavile, va li nomudhalo wokontulo wotjivela omuthilantu ngomulilo, omumbulau ngewe lyosafire nomundumbu ngosulfuri. Omitwe vyodhonkambe vya li amavi ngala ovyodhonkeyama. Movinyo vyadho mwa dha omulilo, omwithi nosulfuri.

¹⁸Otjityatatu tjovantu tja dhipawa kovipo mbyoka vitatu: Omulilo, omwithi nosulfuri mbyaa dha movinyo vyodhonkambe.

¹⁹Iya odhonkono dhodhonkambe dhi li movinyo nomomitjila vyadho. Iya omitjila vyadho vi ngala odhonyoka ndhii na omitwe, omitjila mbyoka mbidhi undapetha okwiihametha navyo ovantu.

²⁰Otjihupe tjovantu mboka mbahava t̯ilile movipo mbyoka, kave liteyululile nokanunu, va yethe okutumbaleka ovipuka mbyoka mbiva undapa nomawoko awo. Iya kava yethele okutumbaleka uke odhondemoni novikalunga vyotjingoldo novyotjisilveri novyotjivela otjindumbu novyomawe novyovimuti mbyoka mbihavi ku mono, mbihavi tee, vyo mbihavi ende.

²¹Iya kave liteyululile va yethe omadhipao awo, omaumpule awo, omalivako awo nomaumpulu awo.